The best things in life are unseen ,, that's why we close our eyes when we kiss, cry, and dream .

2/10/12

لخبطة

 أنا بحذر أى حد بيفكر يقرأ البوست ..
 بلاااااااااااش ..
 هتندم ..
 أفتكر أنى قولتلك بلاااااااااش ..
خلاص بقى أنت حر !

مها مش كويسة
مها مش عارفة تقعد مع مها .. أصلها بقالها كتير بتهرب منها علشان متفتحش معاها مواضيع هى عارفة أنها هتوجعها. دى حتى مش .عارفة لو قعدت معاها هتقولها أيه اصلا ونسيت مفاتيح دخولها
 .حاسة أن الدنيا أخدتنى بعيد عن نفسى والمواقف الى مريت بيها علمتنى حاجات كتير بس خسرتنى حاجات أكتر
كنت عاملة زى الى فمسابقة جرى .. باصص قدامه وبس ومش لاحق ياخد نفسه أو مش عاوز ياخد نفسه أهم حاجة يوصل وبس !
جوايا جزء كبير فااااااااااضى مستنينى أتكلم معاه وأشوفله حل. أصل أنا مشغولة من بره, ومن جوه فراغ. حاسة أنى فقدت تعريف ""مها
كانوا بيقولولى "خدى بالك من نفسك .. نفسك دى مش بتعتك لوحدك". أنا اسفة بس لازم أعترف أنى"فشلت" فالموضوع ده ! أنا مش عارفة آخد بالى منى !!

هفضل أتأكد كل يوم أن قلبى ضعيف أوى وشكل الدم مش بقدر أتحمله

"كل الحاجات الحلوة تستاهل أننا نتعب علشانها"
هو مفيش حاجة حلوة من غير تعب ؟؟ .. لا مفيش .. طيب

"حتى أحبابنا الغاليين وقت الشدة موجودين" Simba <3
بدأت أصدق فحاجات هتخلينى أتأكد أنى فعلا لسعت .. حاجات روحانية

وحشتنى أوى كلمة "حسيت أنى لازم أقولك ومن غير سبب". ياااااااااااااه ده أنا من زمان أوى مسمعتهاش !
"مرة أتسألت "ليه الصديق مش زى الحبيب؟ 
وكانت الأجابة "الصديق بيبقى قريب منك أوى أنما الحبيب بيبقى حتة منك, بتحسى أن الدنيا فيها حد بتاعك أنتى. الصديق صديق لكتير .. الحبيب حبيب لواحد بس" (أه .. مش أنا الى جاوبت . برده

.قلبى بيتقبض لما بحس أنى ممكن أكون "القصة" الى بتحطتلها "كانت" وأنت بتحكى أو بتفتكر

لو بتبعت رسالة متأكد مليون فالمية أنها مش هتوصل .. أيه ممكن يخليك تفضل تبعت وكأن بيوصلك رد ؟؟


"فى قلبى بقايا أمنية" محمود درويش
"لسه جوايا "حبة" أمل بيقولولى تماسكى ..أقولوهم أزاى بس !! يقولولى "كدهو كدهو :)

.وحشونى الناس الى لما كنت باجى اتناقش معاهم فموضوع وأحاول أفهمهم وجهة نظرى وأقول "أنا ...",, هما يكملوا

مش عارفة ليه كل الناس بيوحشونى أوى اليومين دول ! يمكن علشان ذهنى متعلق بفكرة الموت ؟؟


تحديث : صحيت انهارده على خبر وفاة الساخر جلال عامر و Whitney Houston
أزاى ممكن أبقى كويسة أنا بنام كل يوم ومفيش غير سؤال واحد فدماغى .. يا ترى مين الى جاى والدور هيجى عليا أمتى !

14 comments:

  1. السلام عليكم
    طبعاً جذبت انتباهى بقولك بلاش حد يقرأ البوست ده بس برده قريته أينعم عينى تعبت من الألوان بتاعته بس ما علينا.
    ودى تانى مرة بقولك اهو انى بكتب فى مدونتك..ولا حول ولا قوة إلا بالله بدأت تخوفينى أوى.
    واتأثرت بكلمات معينة وفعلاً أنا مفتقدة لحد كان بيسمعنى ويناقشنى بدور عليه دلوقت بس مش لقياه.. نفس عميق ونقول خير ان شاء الله..
    ربنا يطول فى عمرك ويكون فى طاعة ورضا وسعادة.
    دمت بخير.

    ReplyDelete
    Replies
    1. عليكم السلام
      أنا غيرت الألوان أهو علشان عنيكى متزعلش :)
      مع الأفس أنتى جاية فمود زوبالة خالص بصراحة
      هههههههههههه
      يااه هى بوستاتى بقت بتخوف كده
      طيب دى حاجة كويسة :D
      ممممم .. واضح أن الواحد مفروض يكلم ويسمع نفسه علشان ميحتاجش لحد ممكن يحرجه
      ربنا يخليكى ويكرمك .. ميرسى على الدعوتين الحلوين دول :)

      Delete
  2. ممكن نقول إنك حكيتي اللي انا عاوزه أقوله
    بس مش عارفه أقوله لحد خالص
    عشان مش عاوزه أقلق حد عليا

    يارب تلاقي مها اللي إنتي بتدوري عليها

    ReplyDelete
    Replies
    1. أنا عارفة لأننا كنا لسه بنتكلم فالموضوع ده سوا :)
      أدينى قولته على لسانك
      طيب أنا كده الى قلقت !!

      أنا وأنتى يا رب :)

      Delete
  3. :(
    مش قادرة اقول اي تعليق يامها

    ReplyDelete
    Replies
    1. أنا مش مستنية تعليق يا رحمة .. أنا مستنية حد يقولى أدخل لمها أزاى !

      Delete
  4. مها أنا اسفة اوى بس عايزة اقولك حاجة مهمة
    إنتى بتستعبطى !!
    هو فيه ايه يابنت انتِ ؟
    بنت زيك جميلة وكوميديا 24/7 على طول تبقى مكتئبة ؟؟
    انا متضايقة .. لازم يعنى الواحد يغلط ويسبب لنفسه وجع قلب وحاجات من دى كتير
    مش معناه نفضل محبطين ومكتئبين كدة

    انتِ اهو مشيتى خطوة واتكلمتى مع نفسك فى البوست دة
    صالحيها بقى وجيبيلها حاجة حلوة :D بجد مش بهزر

    ReplyDelete
    Replies
    1. والله يا نيللى مش بستعبط
      أنا مش عارفة فى أيه بجد
      أوك أنا كوميدية ودمى خفيف وحلوة وطعمة وعسولة ورقيقة وبضحك وضحكتى جذابة و و و
      so ??
      مفيش أى حاجة من دول عارفة تخرجنى من الى أنا فيه ده دلوقتى !
      أنا متكلمتش معاها يا نيللى .. أنا كجرد تسائلت عن الحالة العامة
      وأصالحها أزاى وهى مستخبية ومش راضية تطلع تقولى مالها اصلا

      U make me smile <3 :)

      Delete
  5. ربنا يديكي راحه البال ان شاء الله
    والف سلامه عليك

    ReplyDelete
    Replies
    1. :)

      اللهم آمين

      الله يسلمك ربنا يخليك

      Delete
  6. عارفة
    ساعات لما ببقى ملخبطة ببقى عارفة من جوايا إيه السبب بس مش لاقية شجاعة إني أدخل وأواجهه

    وساعات تانية ببقى مش عارفة فعلاً .. بس لما بقرب من ناس بحبهم ونتكلم سوا ف أي حاجة .. أو حتى أسيب نفسي اتكلم أنا ف أي حاجة بلاقي كل حاجة جوايا كانت مسخبية طلعت فجأة من غير محس

    عشان القلوب اللي انا بكلمها قلوب برتاحلها وبحبها وشايفة فيهم دفا .. وهيدفوني لما يحسوا البرد اللي جوايا

    ساعات بيبقى تعريف نفسنا مش جوانا أبداً .. بيبقى في تعريف الناس اللي بنحبهم بجد وقلوبهم معانا .. وبنعملهم إيه عشان نسعدهم .. مش بيبقى تعريفنا ف إحنا بنحس بإيه أو بنفكر ف إيه .. بيبقى كتير أوي في احنا بنعمل إيه

    :)

    انا طولت أوي بس معرفش بقيت بحس بلخبطة كتير اليومين دول وحالياً بهرب من كل حاجة

    بس هقولك على حاجة
    حد عزيز عليا أوي قالي
    the Safest Place is to Be in Someone's Prayers ")

    So I'll Pray for U
    & when you Feel apart from the world or insecure suddenly you'll feel safe cause someone is there remembering you

    ولو فتحت في فكرة الموت دي هطول أكتر .. مرة تانية بقى :)

    ReplyDelete
  7. فالحالة الى أنا فيها دلوقتى أنا فعلا مش عارفة

    أنا معاكى جدا .. بس أوقات الموق مش بيكون متطلب مجرد ناس بتحبيهم .. لا ده لازم تكونى بتحبيهم ويكونوا فاهمينك وعندهم خبرة بيكى ويعرفوا أزاى يوصلوا لنقطة الغموض الى جواكى الى أنتى نفسك مش عارفة تفكى شفرتها

    الفترة الى فاتت دى كنت زى ما بتقولى كده مهتمة بالى حواليا أكتر علشان لو كنت أخدت بالى منى كنت هتعب أوى من الى جوايا .. فنفسى بتعاقبنى بقى علشان أهملتها .. بس فعلا أنا مكنش ينفع أعمل غير كده

    :) أنا متأكدة من الموضوع ده .. علشان كده بحب الناس تدعيلى اصلا

    Really ,, i'm speechless and i'm so grateful for u

    ياريت تطولى كده على طول والنبى
    هستناكى مرة تانية :)

    Thanks a lot :)

    ReplyDelete

عاوزة صراحة فالتعليق
مليش فالمجاملات والكلام ده
يلا سمى الله ودوووس :D