الصندوق الخشبى

يفتح صندوقه الخشبى الصغير, يجد جواب يبدو عليه القدم .. فتنهال عليه التساؤلات والحيرة عن ما يمكن أن يكون بهذا الجواب خاصة وأن الصندوق لم يتجاوز عدة دقائق بحوزته

التشتت !"

مشكلتك الوحيدة الى مش هقدر ألومك عليها .. ألومك أزاى وأنت اصلا كل حاجة حواليك بتسوقك لحاجات وحشة كتير انت مكتفى منها بالتشتت بس. عارف ليه ؟؟ علشان أنت قوى ومتماسك وجدع وربنا بيحبك ..عايز مليون حاجة فنفس الوقت تصدق أنك يمكن تكون مش عارف اصلا عاوز ايه !!.. عايز تسافر ؟؟ تتفسح ؟؟ تحب ؟؟ تبقى ناجح ؟؟ وده طبيعى لأنك لسه بتبدأ حياتك ومليان طاقة ودى حاجة حلوة أوى, بس متخليش آمالك وطموحاتك يخسروك حاجات حلوة جواك .. نادرا ما بتكمل حاجة بدأتها .. بس خلى بالك أنت مينفعش تفضل كده على طول اصلا ,, لأن فى حاجات لو بدأتها صعب أوى يمكن مستحيل أنك تقدر تخرج منها ومتكملهاش .. الجنون ."حلو مش  وحش .. مش مضر بالصحة خالص اصلا..حالتك مش مستعصية .. أنت أعقل من الجنون وأجن من العقل فمتقلقش

يسرح بخياله قليلا لأنه يحس أن من ترك هذه الرسالة كأنه كان يقصده هو تحديدا

الحب !"

الصمت يفسد الحب .. تفتكر ؟؟ كريم الشاذلى قال فى كتابه "لغات الحب" نقلا عن باولو كويلو "كم مرة خفت أن تقترب من أنسان ما لتقول له بثقة واطمئنان إنك تحبه ؟؟" "كم مرة كان مطلوبا منك أن تحب وهربت ؟؟ " هو أنت لما حبيت كنت بتبقى حاسس الدنيا حلوة أوى معاها زى ما بيقولوا ؟؟ أنا مش قصدى فاللحظة الى كنت بتبقى فيها معاها .. أنا أقصد لما كانت موجودة فحياتك عامة؟? طيب لما بعدّت .. حسيت بفرق ؟؟ طيب لو هتدى نسبة لفرحتك لما كنتوا سوا هتبقى كام من عشرة ؟؟؟ كانت حلوة ؟؟ بتعرف تقف جنبك وقفة راجل لما تبقى أنت فى شدة ؟؟ بتعرف تساندك ؟؟ بتعرف تحسسك أنك راجل وأنها من غيرك ولا حاجة ؟؟ كان دمها خفيف ولا رخمة وسم ؟؟ كانت بتغير عليك ؟؟ قد أيه كده مثلا ؟؟ .. خلاص خلاص واضح أن السيرة مش عاجباك .. قولى .. أنت كنت بتحبها ؟؟ بتخاف وبتغير عليها ؟؟ من قلبك ولا كده وكده ؟؟ حاولت تبين لها أنها حاجة ولو صغيرة بس مهمة أوى فحياتك ؟؟ كنت حاطتها رقم كام فأهتماماتك ؟؟
واخيرا ..

ثق فى قواك .. تفائل للغد ..حاول بقدر المستطاع أن تُبقى من تحبهم ويحبونك جانبك .. "أنها حياتك .. لن يرسم خطوطها العريضة سواك

بدأ يرتعش لظنه أن هذا جواب من ال... "اللهم أحفظنا" مستحيل أن تكون كل هذه التفاصيل مجرد مصادفة بينه وبين المرسل اليه الأصلى

 "يفيق على يد تضرب على كتفه "إيه يا بنى بقالى ساعة بنده عليك وأنت قاعد هنا سرحان قدام صندوقك الجديد..ها قولى هتحط جواه ايه؟؟"
"هو الى هيحط جوايا مش أنا"