ناس عندنا ذمة

كده يبقى ليك فى ذمتنا كمان بيانين

علشان تتطمن أننا عملنا معاك زى الى قبلك

بس تحذير صغير

قبل ما البيان التالت ينزل

دور على شقة ايجار جديد فأى حتة

أصلك مش هتقعد فيها ثانية بعده

وزى ما قولنا : كلاكيت .. تانى مرة .. أحداث الثورة .. أكشن

هنقولك برده : كلاكيت .. تانى مرة .. الرمى بره .. أكشن

يا ظلمة !

وَمَن يَقْتُلْ مُؤْمِنًا مُّتَعَمِّدًا فَجَزَآؤُهُ جَهَنَّمُ خَالِدًا فِيهَا وَغَضِبَ اللّهُ عَلَيْهِ وَلَعَنَهُ وَأَعَدَّ لَهُ عَذَابًا عَظِيمًا


كفاية بقه والله العظيم حاجة تقرف

هو اى حد يطالب بحقه (بشكل سلمى)يتعمل فى كده ؟؟

انهى دين وانهى شرع وانهى قانون الى يقول ان الى بيحصل فالتحرير ده صح

انهى منطق يقول ان الناس تتضرب بالرصاص فعنيها  وتتجر زى الحمير

لا والمفروض انك تصدق انهم بلطجية وقابضين

بلطجية ايه بقه كفاية كذب
عارفين انا موافقة أنهم بلطجية
وبقولهم شكرا كمان أنكم صحتونا تانى 
بالنسبة للناس المادية الى قبضوا
انا عايزة حد واحد يرد عليا ويقولى ياخد كام الف او كام مليون
وينزل التحرير وهو عارف انه هيموت ولو 1 % حتى
لا وفى بنت اعرفها جاية تقول
"وهو المجلس هيتضرب كده من نفسه , هما اصلا الى بيستفزوه .. هما واقفين هناك ليه"
راحت دكتر مها (مش انا والله) قالتلها
"اه صح واقفين ليه ما يروحوا ياكلوا جاتوه"

بصوا بابا المجلس العسكرى بيحبنا

وعمو المشير بيخاف علينا

دول بلطجية ياى محدش يقرب منهم

الى هيسمع الكلام هيقولوا عليه شطور و أمور و سكور

عارفين كمان هيدولوا بونبوناية كبيرة

هيبقى شكلها حلو اوى من برة

بس لو حد فكر ياكلها 

يبقى يقرا الفاتحة على نفسه قبلها
تعريف الخراطيش عند التليفزيون المصري"

هي بندقيه ملونه
يخرج منها البلالين
تستخدمها الشرطه
للاحتفال بالمتظاهرين !!!!!"

انا مش لاقيه كلام اقوله اصلا

هحسبن وقولوا امين

حسبى الله ونعم الوكيل فالاتى :

فيك يا حسنى مبارك

فيك يا طنطاوى

فكل الفاسدين الى فالمجلس العسكرى

فالعرايس الماريونت الى اسمها اعلام

فكل حد من الشرطة الى كانوا السبب فقتل او جرح اى برئ بيحب بلده وبيطالب بحقه

فأى حد مش بيراعى ربنا فالبلد دى وأهلها ومش بيفكر غير السلطة والكرسى وبس

واخيرا احب أوجه بشرة مهمة لاى ظالم من الى فاتوا او غيرهم

متقلقوش يا حبايبى .. ربنا معانا ومش هيهمنا حد 

اه على فكرة متفتكروش اننا هنخاف من الرصاص او الغاز او الدبابات حتى

لا .. انتم الى مفروض تخافوا مننا

احنا اه عزل ومش معانا اسلحة زيكم

بس معانا دعاء ربنا مأكدلنا انه مستجاب

علشان احنا مظلومين

يا ظلمة !

"شكرا أوى يا ربنا "

أحم أحم ..

أحب ابدأ البوست بتاعى بمسدج 

" شكرا أوى يا ربنا"

يااااااااه .. تصدقوا ربنا بيحبنا أوى أوى 

مدّى لينا نعم كتيييييييير خالص أغلبنا مش عارف قيمتها.

بس الواحد ساعات بيركز ويدقق فى حاجات حواليه ..

بيعرف بيها بعدين ان دى نعم هو مش حاسس بيها .

فى ناس من كلمة بتفهم

وفى ناس من نظرة بتدرك

وفى ناس أشارات كتير بتعدى عليهم وبتفوتهم وهما ولا هنا اصلا .

الواحد بتحصله مواقف بيكتشف انه أحسن من غيره اووى جدا خالص مالص

مثلا .. واحدة مضايقة ومخنوقة وبتعيط ومقفلة الدنيا فى وشها

علشان الولد الى بتحبه سابها 

 تعالوا نتخيل موقف تانى كده

نفس العياط والخنقة والضيق وكل الحاجات الوحشة عند واحدة تانية

بس المرة دى .. ست عاملة كده علشان ابنها مات !!

تعالوا نشوف مشهد تالت 

نفس الاعراض الى فاتت على واحدة ثالتة

علشان ابنها عايش الحمد لله .. بس عنده السرطان وهيموت

يعنى لا عايش ولا ميت

انا ممكن اكمل على الوتيرة دى و أدّى امثلة كتير جدا اصلا

بس كفاية دول

تفتكروا ان لو واحدة من التلاتة فكرت فالى أكثر ابتلائا منها

هيفضل حالهم كده ؟؟

اعتقد كده المشكلة على الاقل نصها اتحل

ولا ايه ؟؟ :)

أسراء : حبيبى مش تزعلى منى 

كنت رخمة وقولت حاجات أرخم 

ايون بهزار أنا عارفة

بس أنا عارفة برده أنك فهمتى معناها :)

وزى مأنا عارفة أنتى كمان عارفة أنى عملت كده علشان بحبك

 ومش عاوزاكى تكونى فى اطار أى نوع من أنواع الخطأ :)

بشكل أو باخر" ها هههههههههههههه"

أحب انهى البوست بمسدج

"شكرا أوى يا ربنا "

الصورة (1)

تفتكروا الصورة دى ممكن يكون معناها ايه ؟؟

انا همسك كل فتفوتة فيها وهشرح المعنى الى انا شايفاه

والى عنده معنى جديد يقولى على طول 

وانا هضيف تحليله للبوست وهكتب اسمه جنبه :)

اولا : وقفة البنوتة

اول ما شوفتها واقفة كده وباصة هناك 

حسيت انها خايفة من حاجة

بتبص من بعيد 

مش عاوزة تدخل جوه

مع أن الحاجة الى خايفة منها دى نور الشمس

يعنى مش مرعب ولا غامض

ده حلو اوى واضح جدا لكل الناس

ثانيا : لبسها

لابسة بالطو طويل خالص 

وبوت طويل 

يمكن لبسها ده بيوحى ان هى خايفة على نفسها جدا

فمحصنة نفسها من كل حتة

بحيث ان مفيش حاجة تقدر تأذيها

دى حتى مدخلة ايديها فجيبها

مش عاوزة اى حاجة تكون نقطة ضعف حد يقدر يوصلها بيها

ثالثا : ورق الشجر

بصوا ازاى ورق الشجر منسدل قدامها

كأنها واخداه سبيل من سبل الحماية ليها

فى منه الى واقع فالارض ولسه اخضر

وفى منه الى اصفر ومات

يعنى كل حاجة حواليها بتحاول تساعدها لحد ما تموت

رابعا : المغزى العام

ساعات الواحد من كتر خوفه انه يتجرح او يتأذى 

بيحاول يبنى سور حواليه

سور يمنع اى حد واى حاجة توصله

بيرضى بالناس الى فحياته وبس

بيخاف من اى حاجة جديدة حتى لو كانت حلوة

بيمشى بمنطق "الى نعرفه احسن من الى منعرفوش"

أو شر معروف أفضل من خير غامض

نا خلصت يلا الدور عليكم :)

ايما :

 أول ما شوفت الصورة 

حسيت ان البنت دى عايزة تقول :

"انا ايه الى جابنى هنا"

ريمو :

 انا اول ما شوفت الصورة  قولت 

ان فى عالم جديد قدام البنت فضولها عايز يدخلها فيه

بس هى بتشوف الاول يا ترى فى ايه ؟!

باشا :

 بنت الظل ..

كأنى شجرة من شمن الاشجار الكتير الى واقفين

هناك بعيد اوى ومش ظاهرين فالصورة دى

كأنى (نيتة ظل ) أذن ..

البنوتة دى بالنسبة لنا هتكون الوردة الحمرا

الى بغصن اخضر ونوارة دهبى

هتكون على رأى الغيطانى " قـِبلة أعيننا"

علشان كده احنا -الاشجار- كلنا ساكتين

ومستمتعين بالجمال البرئ ده

كلنا متوحدين فالسكون لسبب وحيد

والذى لا تعلم تلك البنوتة انها مصدره

رونا : 

كانت تنتظر كل يوم في ذات الصباح ذلك الضوء الذي يعطى لها الامل

 انها بريقها للمرورالي عالم آخر ابهى لم تتكن تتخيل كم هو جميل لهذه الدرجه 

كانت تريد بشده لو انها تخرج من ذلك الكادر وتراه من بعيد كم سيكون جميلآ وبراق لكنها في نفس الوقت خائفه حائرة من تزيل تلك الاوراق وتذهب اليه تراها عن قرب وتستمتع به فاكتفت ان تنظر من بعيدلان خوفها لن يزول في يومآ واحدآوربنا تنتظر منه اشارة بمجيئها الي وربما لاتريد ان تثير ضجه اعقادآ منها في انه سيذهب وقتها فظلت واقفه محافظه علي ثباتها تنظر بامل :)

فراشة :

حسيتها زي اللى طول عمره عايش ف الضلمهولما شاف شويه نور بقى خايف يقرب منه


رضوى :
حسيت الصورة دى بتعبر عن براءة و فضول الأطفال
أنها رغم ان المكان اللى قدامها مش واضح ليها
فهى بتحاول تبص و تعرف ملامحه قبل ما تقرب منه


منة :
انا حسيت كأنها اتولدت جوا قمقم وعاشت جواه ونفسها تخرج 
وأول ما جلها الفرصة لقت نفسها خايفه تخرج وبتحاول تكتشفه من بعيد بحزر شديد


دينا :
اول حاجه جت فى بالى
انها واقفه مستنيه حاجه وبتبص عليها
المكان صورلى اوى جو الخريف والخريف بيحسسنى بكأبه وخصوصا بورق الشجر اللى باللون ده
فا بالتالى حسيت ان المكان مرعب اكتر من احساسى بأن فيه شمس
اما لبسها حسسنى انها بريئه اوى
بس مش استظرفت البالطو الاحمر مع الشوز الاخضر ده هههههههههههههه

فكرة جديدة

انا بحب الصور اوى
بحب اتفرج كده وابحلق وادقق فكل صورة
بحب اشوف كل حاجة فيها قصدها ايه 
فهوقف موضوع البوستس الرومانسية شوية
والخطة كالتاتى :
هعمل كل يوم بوست
هيكون فى صورة
ومعنى الصورة دى ايه بالنسبالى
ولو اى حد شاف فاى صورة من الى هنزلهم معنى تانى
يقولهولى واهو نخلى نظرتنا مبعدية شوية
نحاول نفكر فالحاجات بتعمق 
ها ايه رأيكم ؟؟ الى موافق يرفع ايده :D

Smile .. Real or Fake ?!

 تقوله فاكر .. يرد فاكرة 

 كل الأغانى عدوها تانى  .. وهو فاكر وهى فاكرة 

أول قصيدة فجواب مكرمش .. وكوبرى بنها وسميط مقرمش

يحمر وش الصبية فجأة ,,  هو يسبل .. هى تبربش

تقوله فاكر .. يرد فاكرة

طبعا البوست باين أنه هيبقى رومانسى صح ؟؟

قاعدة على الكنبة .. المروحة شغالة .. تركيز شديد فى المروحة وهى بتلف ..

"أنتى لو عملتى برنامج فالراديو بصوتك ده هيبقى ليكى مستمعين اااااااااااد كده "

"يا ترى هعمل أيه ,, هى النتيجة دى هتظهر أمتى بقى ؟؟ "

"عاوزين نخرج بقه يا بنتى يلا اختارى أنتى المعاد والمكان "

 مها !! أيه مصحيكى لحد دلوقتى يا بنتى ؟؟

                      مفيش يا ماما مش جايلى نوم !!

                  طيب قومى بس على السرير والنوم هيجيلك

حاضر يا ماما (تفضل برده قاعدة فى مكانها على الكنبة ومركزة فالمروحة)

 هل راودك شعور الأنغماس فى تفكيرك لدرجة تفقدك اتصالك بواقعك ؟؟

هل شعرت يوما باندماج أفكارك واختلاطتهم تماما كاختلاط  السكر بالماء عند تقليبه ؟؟

احيانا يراودنى هذا الشعور .. احيانا أحس وكأننى فى عالم آخر بعيد عن عالمنا هذا ..

أحس كأننى فى برج عال وأشاهد الناس من فوق ..

حتى أننى اشاهدنى أنا شخصيا ,, أشاهد تصرفاتى وأفعالى وذكرياتى وكأن شخص آخر قد شارك فى كل هذا !!

أنه شعور رائع أن تحس أنك فقدت اتصالك بواقعك وأنت فيه

أنا شخصيا اشعر براحة غير طبيعية أو يمكن ان تسميها برود أو تتنيح بعدما تنتابنى هذه الحالة !

جرب أن تغمض عينيك وتسد أذنيك وتغلق أى باب أمامك يمكن أن يشوش عليك

لا تجعل الباب مفتوحا الا لعقلك وأفكارك .. اتركها تنساب واحدة تلو الأخرى

  أتركها تمر وكأنها شريط سينما أمام عينيك 

أتركها تلعب وتلهو وأنظر اليها فى صمت تام , كأنك تشاهد بنتك منهمكة مع العابها ولا تريد أن تقاطعها

 انظر الى ذكرياتك

 انظر الى أفكارك

 انظر الى أحلامك

ولكن فى صمت ..

 مهما كانت ذكرياتك مؤلمة

مهما كانت أفكارك مبعثرة

 مهما كانت احلامك مستحيلة

 دعك عن كل هذا وفقط انظر اليها

لن يكون من السهل ادخال نفسك فى هذا المود

لكن حاول .. جرب .. يمكن تعرف

حاول أن تكون فى غيبوبة مؤقتة .. بعدما تنتهى حاول أن تصف احساسك

ثم دقق النظر برهة حولك .. انظر للناس , للعيلة , للاصدقاء

أنى متيقنة من أنك سوف تجد كل منهم فى هذه الغيبوبة المؤقتة

البعض بماله

الآخر بمشكلاته

الثالث بمنصبه

حتى أنت نفسك مجرد انشغالك بهم يجعلك منهم

اذا وجدت هؤلاء الناس .. اعلم تماما انهم ليسوا على قيد الحياه .. ليس لديهم ادنى فكرة ما معنى السعادة مهما امتلك منهم اشياء ..

انهم مسجلون بالسجل المدنى و فقط .. انما ليسوا فى لائحة السجل الشعورى وهو أخطر .. والأدهى من ذلك أنهم غير واعين بكل هذا

 هم من وضعوا أنفسهم فى هذه الغيبوبة تماما كما فعلت أنت .. ولكن الفرق أنهم غير مدركين أنهم هم من وضعوا انفسهم فى كل هذا وليس من السهل العدول عنه

إن معظمنا من هؤلاء .. نبحث على السعادة فى الأماكن الخاطئة .. ونضحك على أنفسنا ونقول وجدناها

لكن مع الوقت نكتشف أننا ارتكبنا أبشع الاخطاء .. والأبشع من ذلك أننا نستمر ونصر ونبحث ثانيا فى نفس نوع الخطأ الاول مع اختلاف الشكل

والبعض منا ينجو ويكون كقطرة الزيت العائمة على الماء دون الاختلاط به

هنيئا لمن كان هكذا

 !! الى متى سنظل فى انتظار جراب الحاوى لنعرف السعادة

الى متى سننتظر كوكا كولا لنفرح !!

أنا نفسى لسه برده مستنياها

بقولها لنفسى قبل ما اقولهالكم

"دور على السعادة فى مكانها الصح اكيد هتلاقيها"

وضحكت عليكم البوست مش رومانسى

ههههههههه

البوست ده قديم من يوم 17/8
انا بحبه اوى اصلا :)

حلم بالأجبار

أكره تلك اللحظة التى تتسلل فيها روحى ليلا لتذهب اليه وتجبرنى على أن اراه فى حلمى !!

صدى صوت

اتنده جواها صوت

يومها رفضت تسمعه

 :ندمت بعدها وقالت

"يمكن صداه كان رجعه"

هو انا مش هشوفك بقه ؟!

وهى جالسة فى شباكها

سارحة حالمة

أتاها طيفه يداعب تفكيرها مع مداعبة النسيم لخدها

فابتسمت ابتسامة تملأها البراءة

وتنهددت وقالت

"هو انا مش هشوفك بقه !"

سكرة حياتى ♥ ♥

عارفة بحبك ليه ؟؟

علشان بحس انك حتة منى

بحس انك قاعدة جوه قلبى 

علشان واحنا بعيد ببقى عاملة :(

ولما بنكون سوا ببقى عاملة :)

علشان واحنا قاعدين مع بعض

فاى مكان .. فاى وقت

بيبقى هو ده أحلى وقت بقضيه فحياتى

الوحيدة الى بتكون معايا فى حزنى قبل فرحى 

بحب اتباهى بيكى قدام كل الناس

بحس انى مامتك

بتفهمينى بمجرد النظرة

بشوف فى عنيكى الفرحة لما أكون مبسوطة

وبشوف فيهم خيبة أمل وانا مضايقة وانتى مش عارفة تعمليلى حاجة

بحس انك تايهة ومتلخبطة من غيرى

بحس ان رأيى بيفرق فحياتك

بحس انك ماسكة فيا زى بنتى

بحس انى بعملك من اول وجديد

بحس اننا بنكمل بعض

واخيرا .. هل يكفيكى هذا الحب يا سكرة حياتى ؟؟ :)

This Post is dedicated to my Star.. to the most wonderful gift that allah bless me with <3

I've found My Esraa .. I'll pray 4 u all to find urs ;)

تركته ..

تركته وقلبها ينزف

تركته وبداخلها رغبة ملحة بأن تعانقه

فكانت تعلم أنها المرة الأخيرة التى ستراه فيها

تعلم أنها المرة الأخيرة التى ستسمع صوته

تعلم انها المرة الأخيرة التى سيلامس كفها يديه

المرة الاخيرة التى ستحدق فى عينيه لتتغلغل بداخله

تنظر اليه وكأنها المرة الأولى التى تراه فيها

كأنها تطبع بداخل عقلها وقلبها صورته

فهى تريد ان تتملى من كل تفصيلة من تفاصيله

تركته وبداخلها حرب شنها عليها قلبها

لأنه يرفض العيش بدونه

تركته وقلبها يهمس 

"لن يدخلنى احد بعدك"

فهى تودعه

وتودع سعادة حياتها

تركها تخرج من الباب

ولم يكن يعلم انها تخرج من حياته !!

اول يوم فالحملة اليومية :)

العيد خلص وهننزل الجامعة تانى
اهئ اهئ :(
اينعم العيد كان اوله حلو
بس بعد كده قلب قلبة ميتحكيش عليها الحقيقة
ما علينا
رونتى حبيبتى قالتلى من فترة ان هيبقى فى حملة تدوين يومى
انا مش كنت عارفة هبدأ فيها ولا ايه
لانى متعودتش اكتب علشان لازم اكتب
انا بكتب لما الوحى بينزل
بس قررت انى لازم اكتب علشان اشغل نفسى
المهم .. ده اللينك بتاع الايفينت
اهو
يا رب يكون شهر حلو
وهحاول على قد ما اقدر انى التزم بالكتابة كل يوم
وهحاول على قد ما اقدر انى اتابع صحابى الى بيكتبوا
والله الموفق والمستعان
النت .. البلوج .. الحملة اليومية
(وش بيرفع أيده علشان القسم)

فى منتهى السعادة :))

ازاى فى ناس كده ؟؟

بجد يعنى !!

هو ينفع تبقى كويس لابعد الحدود مع حد

وهو بيقابل ده بالنقيض تماما ؟؟

هو ايه احساسك لما تكون فاكر انك غير اى حد فى حياة شخص معين

وتكتشف بالصدفة انك ولا حاجة ؟؟

عمرك اتصدمت صدمة تخليك تكره كل حاجة حواليك ؟؟

عمرك اتمنيت انك تكون زى الكرسى الى قاعد عليه علشان ميبقاش عندك شعور ؟؟

عمرك كان عندك سؤال واحد من كلمة واحدة ممكن يغير حياتك كلها ؟؟

عمر كانت "ليه" بالنسبالك هى الحل ؟؟

عمرك كرهت عقلك علشان بيفكرك بحاجات مش عاوز تفتكرها ؟؟

عمرك اتمنيت انك تفضل تصرخ علشان متسمعش صدى ذكريات تضايقك ؟؟

عمرك اتمنيت تقول لحد "اخرس خالص" من كتر ما انتا مضايق منه ؟؟

عمرك اتمنيت تدخل فى غيبوبة كاملة متفوقش منها الا وانتا ناسى كل حاجة واى حاجة ؟؟

عمرك اتمنيت تجيب سكينة وتقطع فى قلبك بمنتهى الاستمتاع مع انك بتخاف وبتكره الدم ؟؟

يااااااااه .. احساس حلو اوى اصلا انك تحس انك فراااااااااااغ

بس فراغ ماليه عتمة

ههههههههههههههههههههههههههههههههههههههههههههههههه

انا فرحااااااااااااااااااااااااااااااااااااااااااااااااااااانة جدا جدا جدا

عارفين انا فرحانة كدهو كدهو وانت السبب

شكرا :)

واخيرا اسبوع حلو :D

احم احم ....

بسم الله ....

الاسبوع ده كان اسبوع كميييييييييل خالص مالص

لييييييييييه بقققققققققققققه ؟؟

هقولكم ليه 

اولا .. خرجت مع انتختى الانتوخة 

خلصنا الجامعة وقولنا نروح وسط البلد

 روحنا اتمشينا 

وفضلنا ندور على مكاتب علشان نشترى كتب

لفينا كتير واكلنا ايس كريم من العبد

وبعد 3 ساعات لف 

وصلنا لمكتبة كده عند الجماعة الامريكية

أى ال AUC

طلعنا اتفرجنا وخرجنا أيد ورا وأيد قدام

طبعا مش كان فينا نفس نمشى تانى

روحنا اعدنا فى سلنترو

واتشقلبنا من الضحك اصلا

وروحنا واكيد وكالعادة فضلنا نرغى ونضحك 

___________________________________

ثانيا .. بقيت مُدرسة

تخيلوا انا مُدرسة !!!!

ههههههههههههههههههههه

ليا واحدة صبحتى بتنزل تريننج فى مدرسة وعرضت عليا اروح معاها ووافقت

روحت الجامعة خلصت محاضراتى واتصلت بيها قولتلها انا جاية

بعد ما روحت, نزلت اخدتنى من عند باب المدرسة 

وطلعنا الفصل

لقيت صحبتى دى اتحولت واحدة تانية جد جدا 

ولقيتها بتقول قيام يا ولاد

دى ميس مها هتدرسلكم معايا انهارده

وانا واقفة عمالة اقول فين ميس مها يا جماعة فين فين

ميس مها ترد بقه عيب كده

لقيتها بتقولى قوليلهم سلاموا عليكم

عمالة ابص حواليا يمكن بتكلم حد مش لاقيه

اكتشفت ان انا ميس مها وانها بتكلمنى

طبعا وبما انى مش بحب اكون محط انظار خاااااااالص بقه

لقيت وشى جاب الوان ومش عارفة اعمل ايه

والفصل كله واقف بصصلى

روحت فضلت اضحك وقولتلهم

"سلاموا عليكم"

من غير ما اشرح بقه انا قولتها ازاى 

جريت فى اخر الفصل واعدت وباصة فى الارض

وكل ما رفع عينى الاقى البنات باصنلى

اتكسف واحط وشى فى الارض زى الى جى يتقدملها عريس

(بتلكك بقه ههههههههههه )

وبعد كتير كده استجمعت قوايا وقمت

طبعا مش بحب اعلى صوتى لانه بيبقى مسرسع جدا جدا :$

بس اضطريت اعليه وسرسع برده

ههههههههههههههههه

وبدأت اتفاعل واشرح واسال البنات

واتكلمت معاهم وضحكتهم 

وفضلوا يقولولى يا ميس تعالى كل مرة

والى جم يسلموا عليا بقه قبل ما امشى 

كنت فرحانة جدا جدا اصلا

بس برده حلفت عظيم بيمين ما هشتغل مُدرسة حتى لو ضربونى بالفلكة :D :D

_____________________________________

ثالثا وده الاهم

جالى وردتين احمرتين :$ :$

يااااااه كنت فرحانة بيهم اووووووووى اصلا 

لانى مش بحب فى حياتى حاجة اكتر من الورد والشوكولاتة 

علشان دماغكم مش تروح لبعيد

بما انى من فصيلة سينجل مع الاسف

فاحب اقولكم ان الوردتين دول كانوا من انتختى برده <3<3

جات يوم الصبح كده لقيتها جايبالى الوردتين 

واليوم الى قبلها كانت جايبالى غويشة شكلها عسول خالص اصلا

بصراحة البنت مظبطانى على الاخر

يبقى احب واتخطب ليه

كفاية عليا أسؤستى حبيبتى :)

______________________________________

 خلاص الاسبوع خلص :D

;كان احلى ما فيه ان محصلتليش حاجة نكدت عليا

هو النكد اصلا موجود بس مش زاد يعنى :)

______________________________________

عيد ميلادى خلاص قرب فاضل شهر و اسبوع :)

والعيد برده قرب فاضل كام يوم

كل سنة وانتم طيبين 

وعيد سعيد عليكم يا رب كده

انا قولت اقولكم بقه بما انى مش هكون موجودة الايام الجاية :)

الى هياكل لحمة يبقى ياكل لى معاه :P