2012 حبيبتى :)

"اللهم لك الحمد كما ينبغى لجلال وجهك وعظيم سلطانك"

أنا كل يوم بتأكد أكتر من الى قبله أن ربنا بيعملى حاجات فحياتى تستاهل الدعوة دى

زى ما قولت .. أنا نفذت المشروع الى كنت مخططاله

وصلت لكل حد أنا بحبه مسدج وعيدت عليه

أنا كنت فرحانة أوى وأنا بعمل كده

بس فرحت أكتر لما شوفت الردود

شوفت كلام شايل جواه معانى كتيرة أوى خلتنى أبتسم ابتسامة أكبر من الدنيا كلها

ده كان نص رد حد منهم والى خلانى أدمع من الفرحة وأنا بقرأه

ردآ علي الرساله الوهميه من شخصيه ليست خياليه

اعتقد قد حازت على لقب أطيب وأحن قلب وأحلى ضحكة كمان :))

عارفة أن المفترض الكلام دة يببقي سر

بس جزء من رسالتى لازم يبقي هنا يعلن عن مدى ابتهاجه برسالتك

وصدقينى أنا محبتكيش اوى علشان فينا من بعض

انا حبيتك لشخصيتك الجميله في حد ذاتها,

والتشابهات اللى كنت بجمعها معاكى كنت بجمعها 

.علشان حسيتها هتبقي هى حجر أساس  فى صداقتنا

إلى من دخلت حياتى فأشبعتها ولونتها 

 MehOo El Naggar

أنا قريت الكلام وحسيت حاجات كتيرة حلوة وملخبطة مع بعض

ومن موقعى هذا أحب أوجه رسالة لرنا وأقولها

"رونتى .. أنا بحبك فالله"

ده غير ردود كتييييييير أوى وحلوة أوى جاتلى اصلا

دينا ورحمة وايناس ومنى وحسنا وسارة ورضوى وايثار وايمان 

ردود اكدتلى إنى لسه فارقة فحياة حد ولسه فى ناس بيحبونى

بعد ما كانت 2011 بدأت تقنعنى بالعكس بسبب مواقفها الكتير أوى معايا

2012 .. لو سمحتى .. أنتى بدأتى حلوة وبسطانى  

كملى على كده بقه أبوس أيدك

أنا بعترفلك أهو من بدايتك إنى مش هقدر أتحمل قد الى أتحمله فالى قبلك

ممكن تخلى جنبى الناس الى بحبهم .. كفاية الى أختك أخدته

   ممكن تكونى شوية عادلة معايا وفمعاملتك ليا

Could u believe that i became more fragile

ممكن تخلينى أنجح فالكلية

ممكن تقربينى أنا وإسراء أكتر

وتقربينى لربنا بزيادة

ومش تخلينى أشوف أى حاجة وحشة فأى حد بحبه

أخر طلب .. ممكن لو سمحتى تبعتيلى عريس شبه حد أنا قولتلك عليه

يكون عسول وطيب ودمه خفيف

 وأهم حاجة يكون بيصلى و طويل 

وعلى نفس طريقة تفكيرى كدهو كدهو

عارفة أن كان فى حد كده .. متزعقيش

أبقى اسأليه هو راح فين أو أسالى اختك 2011 عنه

ياريت تفاجئينى يا 2012 زى المفجئات الى كنت بحبها

بحبك خالص :)

2012 wishes :)

2011 !!

2011

السنة الى تعتبر كبيسة من كتر المصايب الى حصلت فيها

السنة الى قدرنا فيها نغير الرئيس بعد 30 سنة

السنة الى مات فيها شهدا بعدد شعر راسنا

السنة الى ناس كتير فقدوا حياتهم ونور عيونهم علشان ينورولنا طريقنا

السنة الى فى حياتى دخلوا ناس ومن حياتى خرجوا ناس ولحياتى رجعوا ناس

السنة الى اتوجعت فيها اوى

السنة الى فرحت فيها اوى

السنة الى اتمنيت حاجات اتحققت

السنة الى اخدت فيها قرارات محورية فى حياتى

السنة الى ندمت فيها على حاجات لا حصر لها

السنة الى دخلت فيها البلوجر

السنة الى عرفت ناس حبتهم من قلبى بجد

لازم اعترف انى :

كنت قاسية فى كتير من الاوقات وقسوتى ضيعت ناس منى

وكنت طيبة فى كتير من الاوقات وطيبتى ضيعت ناس أكتر

السنة الى هبعت فيها مسدج لكل حد اعرفه اقوله حاجة بينى وبينه

وأول مسدج :

i miss you talking to and about me

Waiting 4 ur msg :)

يا الميدان

بوست انهارده مش هيبقى فى كلام

هيبقى أغنية أقل ما يقال عليها انها رائعة

غناء فريق كاريوكى وعايدة الايوبى

أنا بشكر أول حد عرفنى على عايدة الايوبى

وصدق فى تعريف صوتها أنه "ملائكى" وهو كذلك :)

هو و هى و ..... !!

(الجو بارد .. هواء ليس بشديد وليس بلطيف, النهار قد جلى , لكن الليل لم يخفى كل ضوئه, فمازالت السماء منيرة بضوء القمر)

تمشى ويملأها الامل
فهى عكس الكثير .. فالشتاء بالنسبة لها فرحة ونشاط
وليس حزن وفراق واكتئاب
بينما هى فى طريقها لمكان ما لم تعرفه بعد
وتستمع لموسيقى تريح أعصابها مع هذا الجو
رأت اثنين يمشيان بجانبها من الناحية الاخرى
يرفرف حولهما الحب
فترى عينيهما تلمعا ببريق يكمل بريق القمر
فتبتسم ابتسامة بلا سبب
ووسط هذا كله
يجذب انتباها تشابك ايديهما
فاذا بظلام حالك قد غيم على المكان الداخلى والخارجى
فى نفس اللحظة تنزل منها دمعة ..
دمعة تشبة الابتسامة التى ابتسمتها منذ قليل دون علم سببا لها.
ظهرت على وجهها علامات التعجب
تتعجب من الدمعة التى نزلت
"وسألت نفسها "لم هذه الدمعة؟؟
وما لبثت أن وجدتها تجيب
"ولم العجب !! فلطالما حلمتى بمسك يده ولو مرة"استكملت طريقها الغير معروف ناظرة للسماء 

ها قد مر عامآ
يتذكرها فيه بكل ما فيها
فهى بالنسبه اليه شتاء عميق
قرر في ذات الاعوام ان يترك بصمه
فتركها عليه
كالمطر الذي ياتى فجاه ليمحى كل الماضي
فقد دخلت حياته فجاه وتركته بنفس الشكل
انه لا يتخيل نفسه مع غيرها
حينما ينظر الي اثنين يسيرون متشابكين
الايدى يتذكر كم كانت خجوله ومحافظه
وكم كان ذلك اكثر مايعجبه فيها
ها نحن الان يسير كلآ منا ليلآ وحيدآ"
تنزل الدمعه علي خده"
ويكمل: "ها انا مازلت
ادمع كالطفل التى تركته امه وذهبت بعيدآ لتخيفه قليلآ
ولكن الفرق انك لاتعودى ابدآ مهما انتظرت"
ونظر الي السماء ليتأمل هذا الليل العجيب
ولم يدرك انه يسير دون ان يري طريقه

ثم فجأة .........
تعالى صوت لاغنية لعلى الحجار
"لما الشتا يدق الببان .. لما تنادينى الذكريات .. لما المطر يغسل شوارعنا القديمة والحارات .."
تتلاقى اعينهم
وتبادلت النظرات بينهم
لم يدركا في البدايه
هل ما يراه كل منهما حلم ام حقيقي
انها هى
نعم انه هو
يتلاشى كل ما حولهم
ويبقى الصمت ...
وينزل المطر

تمت

البوست ده مشترك فيه 2 

الجزء الاول بقلم ميس لوزة .. مها يعنى
الجزء التانى بقلم رونا على .. رنا يعنى 
والايديتنج كلانا اشتركنا فيه 

لكل الى هيقروا البوست عاوزين كلمة نكمل بيها النقط فالعنوان 
أكتر كلمة هتليق هنحطتها

شكرا :)

أحم أحم .. أولا أحب أوجه شكر كتير خالص للتالى :

8/12 , اسراء , سارة , سما , نورا , ماجى , منة , سارة2 , ميريهان , وهدى

ميرسى جداااااااا على الهدايا واليوم الكميل ده

ُثانيا .. اأحب أقول ميرسى لكل الى بعتولى مسدجس أو كلمونى يومها :)

ميرسى لكل الى كاتبولى على الفيس اصلا :)

ميرسى لكل حد حط لمسته علشان اليوم يطلع حلو كده.

للناس الى سألت عن ايه الى حصل .. اليكم التفاصيل

بعد الساعة 12 بدأت المكالمات والمسدجس تجيلى .. كنت قاعدة مع أختى باكل علشان كنت هصوم تانى يوم .. اه الى هو عيد ميلادى .. فضلنا نهزر ونضحك بعدين دخلت نمت .. وبمعدل كل ساعة تجيلى مسدج .. اصحى اقراها , ابتسم , وأنام :). صحيت الصبح مرتاحة من جوايا وقررت أن مش هخلى أى حاجة تنكد عليا ابدا .. لبست وكان مفروض هروح الجامعة لوحدى علشان أسراء (الهانم) مش راحت معايا علشان الهدية تبقى مفاجأة. وأول ما طلعت العربية لقيت 50 قرش ووأنا الطريق شوفت وردة بينك.

روحت الجامعة بقه كنت لوحدى لسه مش فى حد جه. أول واحدة قابلتها كانت سما وكانت الهدية عروسة بزمبلك بتعمل موسيقى هادية تحفة جدا. عجبتنى أووووووووى وسمتها زعبولة .. اه زعبولة ههههههه .. تانى حد كانت هدى جابتلى عقد كده هى الى عاملاه شكله سكر خالص , وعملتلى كيك علشان عيد ميلادى مش كانت تعرف أنى صايمة :). تالت واحدة كانت سارة جبتلى ساعة حائط على شكل قلب وجبتلى مخدة لونها احمر فأسود عسووووولة. رابع واحدة كانت كانت سارة 2 وجابتلى انسيال وبيرفيوم. خامس حد كانت حبيبتى وانتختى أسراء .. هداياها عاوزالها بوست لوحده بس هحاول ألخصهم .. جابتلى جاكت أسود صوف مخرم كده علشان عرفت انى بحب الحاجات المخرمة .. وجابتلى سكارف .. واكسسوارات وساعة حائط برده بينكى توووووووحفةةةةة . الحاجات دى كانت فى بوكس عسولى اوى :) . سادس واحدة كانت ميريهان جايتلى شوكولاتاية كبيييييييرة. والاخيرة كانت منة جابتلى علبة اكسسوارات  شيلتها للجهاز اصلا من جمالها :D سابع واحدة كانت نورا .. جبيتلى 3 كتب كان نفسى فيهم اصلا

فضلت فى الجامعة طول اليوم وقبل المغرب روحت مع أسراء وسارة الدقى مشى علشان أفطر فى سمسمة.. اصلى بحب استمتع بالاكل :D

خلصنا وركبت أنا وأسراء واتبهدلنا فى المواصلات كالعادة وخاصة لاننا كنا شايلين الحاجات بقه وكتيييير.

أنا أعترف  أحلى ما كان فى اليوم البوك الى أنتختى عملتهولى .. دى كانت مفجأة اليوم اصلا الكلام الى فيه وانا بقراه كنت مبتسمة وبعيط :). ربنا يخليكى ليا ومش يحرمنى منك ابدا اصلا, ولا يحرمنى من أى حد سبب فى سعادتى 

دى كانت الاستاتس بتاعتى على الفيس بعد عيد ميلادى بيوم :)

بمناسبة أن انهارده أول يوم فسنتى ال 19 .. أحب أقول .. أحم أحم

السنة الى فاتت كانت حلوة جدا ..أنا فخورة بكل قرار أخدتهفخورة بكل تغيير فيا وفى شخصيتىمبسوطة بكل حد جديد دخل حياتىزعلانة على كل حد كويس خرج منهامش هممنى كل حد مش كويس مبقاش فيهامش راضية أوى عن علاقتى بربنا وعاوزة أكترعندى دافع أنى اخلى السنة دى أحلى وأحلىربنا .. أنا بحبك اوى ♥♥ :)

NB.. حاولت على قد ما أقدر أقلل فى الاصلا بتاعتى علشان البوست :$ :$

عزيزى 8/12

عزيزى 8/12

اكتب اليك هذا الخطاب وانا على وشك القرب منك .. انا فعلا فى حاجة الى ان تأتى .. ما أكثر ال 8/12 الذين مررت بهم فى حياتى .. لكنى اتمنى ان تكون مختلف .. هل ستسمحلى بتغيير فكرتى عن 8/12 المعتاد ؟؟ هل ستفاجئنى ؟؟ هل ستكون الربيع الذى يغير شكل زهور حياتى الصفراء من كثرة الشتاء ؟؟ هل ستكون حقا اليوم الذى لا اتمنى انجلائه ؟؟ هل ستحقق لى السعادة التى سأنام اليوم احلم بها ؟؟ هل ستأتى بكل من احبهم حولى ؟؟ هل ستتركنى ارى الفرحة على وجوه من حولى لرؤيتهم الفرحة فى عينى ؟؟ هل ستكون السراء التى سأحمد الله عليها اخر اليوم ؟؟ هل ستجعلنى اطلق عليك عن اقتناع انك يومى المفضل ؟؟ هل ستجعلنى انتظرك من السنة للسنة شوقا ولهفة ؟؟ واخيرا اريد ان اتقدم اليك بطلبى الاهم

ممكن تخرعنى ؟؟ :D

حبيبتك العسولة الامورة السكورة خالص مالص

مها

:$

يا رب لو سمحت أبعتلي مفجأة عنيا تدمع وقلبي يعجز عن تصديقها من كتر جمالها

ناس عندنا ذمة

كده يبقى ليك فى ذمتنا كمان بيانين

علشان تتطمن أننا عملنا معاك زى الى قبلك

بس تحذير صغير

قبل ما البيان التالت ينزل

دور على شقة ايجار جديد فأى حتة

أصلك مش هتقعد فيها ثانية بعده

وزى ما قولنا : كلاكيت .. تانى مرة .. أحداث الثورة .. أكشن

هنقولك برده : كلاكيت .. تانى مرة .. الرمى بره .. أكشن

يا ظلمة !

وَمَن يَقْتُلْ مُؤْمِنًا مُّتَعَمِّدًا فَجَزَآؤُهُ جَهَنَّمُ خَالِدًا فِيهَا وَغَضِبَ اللّهُ عَلَيْهِ وَلَعَنَهُ وَأَعَدَّ لَهُ عَذَابًا عَظِيمًا


كفاية بقه والله العظيم حاجة تقرف

هو اى حد يطالب بحقه (بشكل سلمى)يتعمل فى كده ؟؟

انهى دين وانهى شرع وانهى قانون الى يقول ان الى بيحصل فالتحرير ده صح

انهى منطق يقول ان الناس تتضرب بالرصاص فعنيها  وتتجر زى الحمير

لا والمفروض انك تصدق انهم بلطجية وقابضين

بلطجية ايه بقه كفاية كذب
عارفين انا موافقة أنهم بلطجية
وبقولهم شكرا كمان أنكم صحتونا تانى 
بالنسبة للناس المادية الى قبضوا
انا عايزة حد واحد يرد عليا ويقولى ياخد كام الف او كام مليون
وينزل التحرير وهو عارف انه هيموت ولو 1 % حتى
لا وفى بنت اعرفها جاية تقول
"وهو المجلس هيتضرب كده من نفسه , هما اصلا الى بيستفزوه .. هما واقفين هناك ليه"
راحت دكتر مها (مش انا والله) قالتلها
"اه صح واقفين ليه ما يروحوا ياكلوا جاتوه"

بصوا بابا المجلس العسكرى بيحبنا

وعمو المشير بيخاف علينا

دول بلطجية ياى محدش يقرب منهم

الى هيسمع الكلام هيقولوا عليه شطور و أمور و سكور

عارفين كمان هيدولوا بونبوناية كبيرة

هيبقى شكلها حلو اوى من برة

بس لو حد فكر ياكلها 

يبقى يقرا الفاتحة على نفسه قبلها
تعريف الخراطيش عند التليفزيون المصري"

هي بندقيه ملونه
يخرج منها البلالين
تستخدمها الشرطه
للاحتفال بالمتظاهرين !!!!!"

انا مش لاقيه كلام اقوله اصلا

هحسبن وقولوا امين

حسبى الله ونعم الوكيل فالاتى :

فيك يا حسنى مبارك

فيك يا طنطاوى

فكل الفاسدين الى فالمجلس العسكرى

فالعرايس الماريونت الى اسمها اعلام

فكل حد من الشرطة الى كانوا السبب فقتل او جرح اى برئ بيحب بلده وبيطالب بحقه

فأى حد مش بيراعى ربنا فالبلد دى وأهلها ومش بيفكر غير السلطة والكرسى وبس

واخيرا احب أوجه بشرة مهمة لاى ظالم من الى فاتوا او غيرهم

متقلقوش يا حبايبى .. ربنا معانا ومش هيهمنا حد 

اه على فكرة متفتكروش اننا هنخاف من الرصاص او الغاز او الدبابات حتى

لا .. انتم الى مفروض تخافوا مننا

احنا اه عزل ومش معانا اسلحة زيكم

بس معانا دعاء ربنا مأكدلنا انه مستجاب

علشان احنا مظلومين

يا ظلمة !

"شكرا أوى يا ربنا "

أحم أحم ..

أحب ابدأ البوست بتاعى بمسدج 

" شكرا أوى يا ربنا"

يااااااااه .. تصدقوا ربنا بيحبنا أوى أوى 

مدّى لينا نعم كتيييييييير خالص أغلبنا مش عارف قيمتها.

بس الواحد ساعات بيركز ويدقق فى حاجات حواليه ..

بيعرف بيها بعدين ان دى نعم هو مش حاسس بيها .

فى ناس من كلمة بتفهم

وفى ناس من نظرة بتدرك

وفى ناس أشارات كتير بتعدى عليهم وبتفوتهم وهما ولا هنا اصلا .

الواحد بتحصله مواقف بيكتشف انه أحسن من غيره اووى جدا خالص مالص

مثلا .. واحدة مضايقة ومخنوقة وبتعيط ومقفلة الدنيا فى وشها

علشان الولد الى بتحبه سابها 

 تعالوا نتخيل موقف تانى كده

نفس العياط والخنقة والضيق وكل الحاجات الوحشة عند واحدة تانية

بس المرة دى .. ست عاملة كده علشان ابنها مات !!

تعالوا نشوف مشهد تالت 

نفس الاعراض الى فاتت على واحدة ثالتة

علشان ابنها عايش الحمد لله .. بس عنده السرطان وهيموت

يعنى لا عايش ولا ميت

انا ممكن اكمل على الوتيرة دى و أدّى امثلة كتير جدا اصلا

بس كفاية دول

تفتكروا ان لو واحدة من التلاتة فكرت فالى أكثر ابتلائا منها

هيفضل حالهم كده ؟؟

اعتقد كده المشكلة على الاقل نصها اتحل

ولا ايه ؟؟ :)

أسراء : حبيبى مش تزعلى منى 

كنت رخمة وقولت حاجات أرخم 

ايون بهزار أنا عارفة

بس أنا عارفة برده أنك فهمتى معناها :)

وزى مأنا عارفة أنتى كمان عارفة أنى عملت كده علشان بحبك

 ومش عاوزاكى تكونى فى اطار أى نوع من أنواع الخطأ :)

بشكل أو باخر" ها هههههههههههههه"

أحب انهى البوست بمسدج

"شكرا أوى يا ربنا "

الصورة (1)

تفتكروا الصورة دى ممكن يكون معناها ايه ؟؟

انا همسك كل فتفوتة فيها وهشرح المعنى الى انا شايفاه

والى عنده معنى جديد يقولى على طول 

وانا هضيف تحليله للبوست وهكتب اسمه جنبه :)

اولا : وقفة البنوتة

اول ما شوفتها واقفة كده وباصة هناك 

حسيت انها خايفة من حاجة

بتبص من بعيد 

مش عاوزة تدخل جوه

مع أن الحاجة الى خايفة منها دى نور الشمس

يعنى مش مرعب ولا غامض

ده حلو اوى واضح جدا لكل الناس

ثانيا : لبسها

لابسة بالطو طويل خالص 

وبوت طويل 

يمكن لبسها ده بيوحى ان هى خايفة على نفسها جدا

فمحصنة نفسها من كل حتة

بحيث ان مفيش حاجة تقدر تأذيها

دى حتى مدخلة ايديها فجيبها

مش عاوزة اى حاجة تكون نقطة ضعف حد يقدر يوصلها بيها

ثالثا : ورق الشجر

بصوا ازاى ورق الشجر منسدل قدامها

كأنها واخداه سبيل من سبل الحماية ليها

فى منه الى واقع فالارض ولسه اخضر

وفى منه الى اصفر ومات

يعنى كل حاجة حواليها بتحاول تساعدها لحد ما تموت

رابعا : المغزى العام

ساعات الواحد من كتر خوفه انه يتجرح او يتأذى 

بيحاول يبنى سور حواليه

سور يمنع اى حد واى حاجة توصله

بيرضى بالناس الى فحياته وبس

بيخاف من اى حاجة جديدة حتى لو كانت حلوة

بيمشى بمنطق "الى نعرفه احسن من الى منعرفوش"

أو شر معروف أفضل من خير غامض

نا خلصت يلا الدور عليكم :)

ايما :

 أول ما شوفت الصورة 

حسيت ان البنت دى عايزة تقول :

"انا ايه الى جابنى هنا"

ريمو :

 انا اول ما شوفت الصورة  قولت 

ان فى عالم جديد قدام البنت فضولها عايز يدخلها فيه

بس هى بتشوف الاول يا ترى فى ايه ؟!

باشا :

 بنت الظل ..

كأنى شجرة من شمن الاشجار الكتير الى واقفين

هناك بعيد اوى ومش ظاهرين فالصورة دى

كأنى (نيتة ظل ) أذن ..

البنوتة دى بالنسبة لنا هتكون الوردة الحمرا

الى بغصن اخضر ونوارة دهبى

هتكون على رأى الغيطانى " قـِبلة أعيننا"

علشان كده احنا -الاشجار- كلنا ساكتين

ومستمتعين بالجمال البرئ ده

كلنا متوحدين فالسكون لسبب وحيد

والذى لا تعلم تلك البنوتة انها مصدره

رونا : 

كانت تنتظر كل يوم في ذات الصباح ذلك الضوء الذي يعطى لها الامل

 انها بريقها للمرورالي عالم آخر ابهى لم تتكن تتخيل كم هو جميل لهذه الدرجه 

كانت تريد بشده لو انها تخرج من ذلك الكادر وتراه من بعيد كم سيكون جميلآ وبراق لكنها في نفس الوقت خائفه حائرة من تزيل تلك الاوراق وتذهب اليه تراها عن قرب وتستمتع به فاكتفت ان تنظر من بعيدلان خوفها لن يزول في يومآ واحدآوربنا تنتظر منه اشارة بمجيئها الي وربما لاتريد ان تثير ضجه اعقادآ منها في انه سيذهب وقتها فظلت واقفه محافظه علي ثباتها تنظر بامل :)

فراشة :

حسيتها زي اللى طول عمره عايش ف الضلمهولما شاف شويه نور بقى خايف يقرب منه


رضوى :
حسيت الصورة دى بتعبر عن براءة و فضول الأطفال
أنها رغم ان المكان اللى قدامها مش واضح ليها
فهى بتحاول تبص و تعرف ملامحه قبل ما تقرب منه


منة :
انا حسيت كأنها اتولدت جوا قمقم وعاشت جواه ونفسها تخرج 
وأول ما جلها الفرصة لقت نفسها خايفه تخرج وبتحاول تكتشفه من بعيد بحزر شديد


دينا :
اول حاجه جت فى بالى
انها واقفه مستنيه حاجه وبتبص عليها
المكان صورلى اوى جو الخريف والخريف بيحسسنى بكأبه وخصوصا بورق الشجر اللى باللون ده
فا بالتالى حسيت ان المكان مرعب اكتر من احساسى بأن فيه شمس
اما لبسها حسسنى انها بريئه اوى
بس مش استظرفت البالطو الاحمر مع الشوز الاخضر ده هههههههههههههه

فكرة جديدة

انا بحب الصور اوى
بحب اتفرج كده وابحلق وادقق فكل صورة
بحب اشوف كل حاجة فيها قصدها ايه 
فهوقف موضوع البوستس الرومانسية شوية
والخطة كالتاتى :
هعمل كل يوم بوست
هيكون فى صورة
ومعنى الصورة دى ايه بالنسبالى
ولو اى حد شاف فاى صورة من الى هنزلهم معنى تانى
يقولهولى واهو نخلى نظرتنا مبعدية شوية
نحاول نفكر فالحاجات بتعمق 
ها ايه رأيكم ؟؟ الى موافق يرفع ايده :D

Smile .. Real or Fake ?!

 تقوله فاكر .. يرد فاكرة 

 كل الأغانى عدوها تانى  .. وهو فاكر وهى فاكرة 

أول قصيدة فجواب مكرمش .. وكوبرى بنها وسميط مقرمش

يحمر وش الصبية فجأة ,,  هو يسبل .. هى تبربش

تقوله فاكر .. يرد فاكرة

طبعا البوست باين أنه هيبقى رومانسى صح ؟؟

قاعدة على الكنبة .. المروحة شغالة .. تركيز شديد فى المروحة وهى بتلف ..

"أنتى لو عملتى برنامج فالراديو بصوتك ده هيبقى ليكى مستمعين اااااااااااد كده "

"يا ترى هعمل أيه ,, هى النتيجة دى هتظهر أمتى بقى ؟؟ "

"عاوزين نخرج بقه يا بنتى يلا اختارى أنتى المعاد والمكان "

 مها !! أيه مصحيكى لحد دلوقتى يا بنتى ؟؟

                      مفيش يا ماما مش جايلى نوم !!

                  طيب قومى بس على السرير والنوم هيجيلك

حاضر يا ماما (تفضل برده قاعدة فى مكانها على الكنبة ومركزة فالمروحة)

 هل راودك شعور الأنغماس فى تفكيرك لدرجة تفقدك اتصالك بواقعك ؟؟

هل شعرت يوما باندماج أفكارك واختلاطتهم تماما كاختلاط  السكر بالماء عند تقليبه ؟؟

احيانا يراودنى هذا الشعور .. احيانا أحس وكأننى فى عالم آخر بعيد عن عالمنا هذا ..

أحس كأننى فى برج عال وأشاهد الناس من فوق ..

حتى أننى اشاهدنى أنا شخصيا ,, أشاهد تصرفاتى وأفعالى وذكرياتى وكأن شخص آخر قد شارك فى كل هذا !!

أنه شعور رائع أن تحس أنك فقدت اتصالك بواقعك وأنت فيه

أنا شخصيا اشعر براحة غير طبيعية أو يمكن ان تسميها برود أو تتنيح بعدما تنتابنى هذه الحالة !

جرب أن تغمض عينيك وتسد أذنيك وتغلق أى باب أمامك يمكن أن يشوش عليك

لا تجعل الباب مفتوحا الا لعقلك وأفكارك .. اتركها تنساب واحدة تلو الأخرى

  أتركها تمر وكأنها شريط سينما أمام عينيك 

أتركها تلعب وتلهو وأنظر اليها فى صمت تام , كأنك تشاهد بنتك منهمكة مع العابها ولا تريد أن تقاطعها

 انظر الى ذكرياتك

 انظر الى أفكارك

 انظر الى أحلامك

ولكن فى صمت ..

 مهما كانت ذكرياتك مؤلمة

مهما كانت أفكارك مبعثرة

 مهما كانت احلامك مستحيلة

 دعك عن كل هذا وفقط انظر اليها

لن يكون من السهل ادخال نفسك فى هذا المود

لكن حاول .. جرب .. يمكن تعرف

حاول أن تكون فى غيبوبة مؤقتة .. بعدما تنتهى حاول أن تصف احساسك

ثم دقق النظر برهة حولك .. انظر للناس , للعيلة , للاصدقاء

أنى متيقنة من أنك سوف تجد كل منهم فى هذه الغيبوبة المؤقتة

البعض بماله

الآخر بمشكلاته

الثالث بمنصبه

حتى أنت نفسك مجرد انشغالك بهم يجعلك منهم

اذا وجدت هؤلاء الناس .. اعلم تماما انهم ليسوا على قيد الحياه .. ليس لديهم ادنى فكرة ما معنى السعادة مهما امتلك منهم اشياء ..

انهم مسجلون بالسجل المدنى و فقط .. انما ليسوا فى لائحة السجل الشعورى وهو أخطر .. والأدهى من ذلك أنهم غير واعين بكل هذا

 هم من وضعوا أنفسهم فى هذه الغيبوبة تماما كما فعلت أنت .. ولكن الفرق أنهم غير مدركين أنهم هم من وضعوا انفسهم فى كل هذا وليس من السهل العدول عنه

إن معظمنا من هؤلاء .. نبحث على السعادة فى الأماكن الخاطئة .. ونضحك على أنفسنا ونقول وجدناها

لكن مع الوقت نكتشف أننا ارتكبنا أبشع الاخطاء .. والأبشع من ذلك أننا نستمر ونصر ونبحث ثانيا فى نفس نوع الخطأ الاول مع اختلاف الشكل

والبعض منا ينجو ويكون كقطرة الزيت العائمة على الماء دون الاختلاط به

هنيئا لمن كان هكذا

 !! الى متى سنظل فى انتظار جراب الحاوى لنعرف السعادة

الى متى سننتظر كوكا كولا لنفرح !!

أنا نفسى لسه برده مستنياها

بقولها لنفسى قبل ما اقولهالكم

"دور على السعادة فى مكانها الصح اكيد هتلاقيها"

وضحكت عليكم البوست مش رومانسى

ههههههههه

البوست ده قديم من يوم 17/8
انا بحبه اوى اصلا :)