The best things in life are unseen ,, that's why we close our eyes when we kiss, cry, and dream .

1/16/12

قصاقيص أفكار




الحاجات الحلوة الى بجد بتبان لما الى بيعملها مبيبقاش عارف أننا عارفين أن هو بيعملها وبرده مكمل وبيعملها


وساعات بنحن للماضى بصورة توقف الحاضر


بحس أن حضن بابا ليا وطن .. وحضن ماما هو الأمان


بكره الحركة الى دايما بعملها .. أنى ابدأ كلام يجرنى لكلام أنا مش عايزة أتكلم فيه


I've missed you talking to and about me 


نفسى أعرف منين بجيب الصبر الى بسيب بيه باب الأمل مفتوح


ساعات الكلام الى بيتكتب بيبقى مخبى حقايق تانية عكس اتجاهه .. أنا نفسى بقه أشيل الكلام وأشوف الى وراه


أنا بحب الناس الى بتخلى لكل كلمة فحياتها معنى


ساعات بنحن لحاجات مبقاش ينفع نحن ليها


ولسه من غبائها متخلصتش .. مصدقة ومتعلمتش 


نفسى ألبس جلابية فلاحى ومنديل مشجر :$


برد المشاعر ألعن ألف مرة من برد الجو


ليه دايما كله متوقع منى التماسك ؟؟


حتى النوم مش مديلى فرصة أحلم


وأنا بذاكر طرق الترجمة .. أكتشفت أن أصعبهم ترجمة المشاعر


بفرح أوى لما بلاقى حد بيقرا كلامى ويقول "أيون هو ده الى بيحصل" أو "أه  أنا حسيت بكده"  .. يعنى بفرح لما بعرف أوصل مشاعر فى حد حاسسها ومش عارف يقولها :)


عدم رؤيتنا للأشياء لا ينفى وجودها بل ساعات بيبقى أكبر دليل على كونها حقيقة !!


كل شخص عامل زى قطعة البازل فحياة شخص أخر .. يعنى محدش بيملى مكان حد


Dear Nostalgia .. Dun flirt my memories cuz my tears have no intention to show itself off !


لما تتوه من نفسك .. دور أحلم حاول ترجع
أصل التوهة دى زى اللزقة 
لو يوم راح تستسلم ليها ..لا تلوم ولا تعتب ولا تزعل


عندى حساسية رهيبة ضد المظاهر 

24 comments:

  1. ميهو
    تعرفي
    كل قصقوصة من دول
    ممكن يتعمل عليها بوستات كتير !!
    هي الامتحانات بتطلع المواهب والافكار كدا ؟؟

    ساعات الكلام الى بتكتب بيبقى مخبى حقايق تانية عكس اتجاهه .. أنا نفسى بقه أشيل الكلام وأشوف الى وراه

    اغلبنا بيكتب عشان يطلع اللي جواه وفي نفس الوقت يداري حاجات تانية مش عايز يبوح بيها ادام الناس !!

    هممم
    انا لو اخدت اصلا قصقوصة قصقوصة وعلقت عليها يبقي مش هنخلص :))

    انتي عسل وخلاويص بقي <3

    ReplyDelete
  2. انا حاسة إن دخلت مخك وانتى بتفكرى :D !

    ReplyDelete
  3. عارفة أنا القصاقيص دى
    أصل أختك عندها كتير منهم ^^
    بيبقى شعور مركز بيطلع فى وقته وبيبقى له إحساس تانى :)

    أنا بحب الناس الى بتخلى لكل كلمة فحياتها معنى
    دى وقفت قدامها شوية كدة :) .. جميــلة أوى

    ReplyDelete
  4. وعلي راي انا ايوان ما انتى عارفانى فيلسوفه طول عمرى

    يقولك وقت الزنقه بتطلع الحاجات الحلوة ^_^

    ايه الجمال دة يا بنتى

    برد المشاعر ألعن ألف مرة من برد الجو
    اعااااااا حاسيتها حاجه رهيبه اوى بيجد
    كنت مشمئزة من مجرد التفكير فيها اصلآ :)

    موضوع البيزل دة عجبنى اوى كمان بالمفيد المختصر البوست يجنن

    ملحوظه سريه مشفره
    العنوان جامد اخر حاجه ^_^

    ReplyDelete
  5. "نفسى أعرف منين بجيب الصبر الى بسيب بيه باب الأمل مفتوح


    ساعات بنحن لحاجات مبقاش ينفع نحن ليها"

    مش لاقيه تعليق اقوله
    غيرك انك قولتى حاجات بجد جوايا صح
    ياريت البوست ده يبقى مستمر كل فتره تنزلى حاجه كده
    بجد حلو اوى

    ReplyDelete
  6. حتى النوم مش مديلى فرصة أحلم

    وأنا بذاكر طرق الترجمة .. أكتشفت أن أصعبهم ترجة المشاعر

    ** حبيتهم اووووي و الاتنين دول بالاخص
    تسلم ايديك :)

    ReplyDelete
  7. عدم رؤيتنا للأشياء لا ينفى وجودها بل ساعات بيبقى أكبر دليل على كونها حقيقة !!

    ّّّّّّّّّّّّّّ

    انا مقتنع اوى بالجملة دى كان فى حاجة زيها فى خيالى
    سبحان الله دخلت هنا انتى قولتيها وريحتيلى دماغى ههههههه

    بس حلوة القصاقيص دى

    يسلم قلمك وافكارك

    تحياتى

    ReplyDelete
  8. أحلى بوست بجد قريته ليكى ياميهووووو

    ReplyDelete
  9. ايه ده بجد بجد

    مش لاقيه حاجه اقولها غير انها احلى قصاقيص أفكار قريتها

    بجد حلوة قوي

    وكلام ف سرك ,,, معظمها فكرت فيه قبل كده :)

    ReplyDelete
  10. حقيقى المشاعر كل ماتكون بسيطة كل ماتكون قوتها اعلى

    احييكى من كل قلبي

    ReplyDelete
  11. بجد عجبتني اوي احلى ما فيها ان كل واحد فينا حس بحاجة منها في يوم من الايام

    ReplyDelete
  12. ليه دايما كله متوقع منى التماسك ؟؟
    بكره الشعور ده بجد ... لازم اي حد مهما كانت قوته وتماسكه هيجي عليه وقت ويبقى عايز حد يسنده ويحس بيه مش يستغرب ضعفه ,وده اللي انا فيه دلوقتي

    ReplyDelete
  13. 7lwa gdn :D
    a whole new level of sharing thoughts; such thoughts have crossed all of our minds at one point or another. It feels good to know that we r not the only ones who think such thoughts; & sometimes u can't express ur thoughts or feelings & it is good to find the words that express exactly what u want to say!! :D
    KEEP IT UP! <3

    ReplyDelete
  14. برد المشاعر ألعن ألف مرة من برد الجو
    فعلاً ده اللي انا حاسس بيه في البرد ده

    ReplyDelete
  15. ياااااااه كل ده

    هو الشتا بيطلع اللي جوانا كده ليه :)

    عاجبني البوست

    ودلوقتي حسيت بمأساة لما بكتب حاجات كتير ف بوست واحد والناس مبتعرفش تعلق علي ايه بالظبط D:

    ملحوظة: لو جبتي جلابية ومنديل مشجر ابعتيهوملي D:

    ReplyDelete
  16. بفرح أوى لما بلاقى حد بيقرا كلامى ويقول "أيون هو ده الى بيحصل" أو "أه أنا حسيت بكده" .. يعنى بفرح لما بعرف أوصل مشاعر فى حد حاسسها ومش عارف يقولها :)

    وانا كمان :)

    ReplyDelete
  17. نداء الى اصحاب القلوب الرحيمة
    لو هاتكتبوا تدوينة طويلة , تعالى فى الاخر واكتب الدروس المستفادة من التدوينة عشان انا بتلخبط بسرعة و اجى فى الاخر ابقى مش عارف ارد على اية ولا اية :D

    ReplyDelete
  18. انتى ملخبطة كدة زى التوينة دى بظبط :)

    مقدرش اقولك حاجة عن الاسلوب علشان دى مشاعر حلاوتها انها طالعة زى ما هى كدة و هى على العموم حلوة كدة برضه :)

    انا بفضل تكتبر لتدوينة كلها انجليزى او عربى بس اللخبطة هنا لايقة على المشاعر بتاعة التدوينة :)

    ReplyDelete
  19. حلوه جداا تسلمي ع كلامك :)

    ReplyDelete
  20. تقولين انك تفرحين حين تجدى حد يقرأ كلامك
    انا بفرح لما الاقى كلامك بجد
    اشعر اننى لست لوحدى بمشاعرى فهناك من يشاركنى افراحى واحزانى آلامى وآمالى
    دمتى لمحبتنا

    ReplyDelete
    Replies
    1. كلام جامد اوي يا لوزه واحلى جمله قولتيها
      برد المشاعر ألعن ألف مرة من برد الجو
      تسلم ايدك
      تقبلي مروري

      Delete
  21. جميله جدا تسلم ايدك طبعا على احلى قصاقيص

    ReplyDelete

عاوزة صراحة فالتعليق
مليش فالمجاملات والكلام ده
يلا سمى الله ودوووس :D