The best things in life are unseen ,, that's why we close our eyes when we kiss, cry, and dream .

4/27/12

حدوتة .. بجد

الدنيا مش حلوة أوى ولا هادية وبريئة أوى زى ما أحنا متخيلين .. الدنيا مش جامعة وصحاب وحب ومشاكل بس .. مش حب وغرام وهيام وقلوب حمرا .. فى حاجات كتير جدا أحنا لسه مش عارفين عنها حاجة .. زينا زى ابن الاغنيا لما يشوف الناس طوابير على الفرن بتاع العيش ويستغرب أوى ويقول "طيب ليه مش بيجيبوا فينو !" .. الدنيا فيها جانب شر أحنا من هبلنا مش متخيلين أنه موجود .. فيها الأبن الى بيقتل أبوه فى خناقة .. فيها الأب الى بيغتصب بنته .. فيها الأب الى بيبهدل عيلته علشان الشرب والخمرة .. فيها حاجات لا حصر لها .. حاجات من الى أحنا بنسمعها كأنها حدوتة .. كأنها حكاية سندريلا أو سنووايت .. كأنها حاجات أتعملت علشان تتسمع بس ومنعيشهاش .. أحنا بنفكر فى الخمرة والمخدرات والدعارة أنها حاجة بعيد عننا .. لأن أهلنا ربّونا وحطوا جوانا قيم وأخلاق تخلى مخّنا يتبرمج أن من كتر ما الحاجات دى وحشة , مينفعش تتعمل اصلا ولا ينفع تبقى موجودة بجد .. القيم والأخلاق الى بتخلينى أنا شخصيا اتنرفز لما حد يتكلم مجرد كلام عن الحاجات دى .. القيم والأخلاق الى بتخلينى أتصدم لو شوفت حاجة من الحاجات دى بجد أو سمعت من حد عنها .. القيم والأخلاق الى بتولّد جوانا القلق والخوف على الى بنحبهم من أنهم يتعرضوا لأى حاجات من دول .. مش بعرض الموضوع علشان نحله .. لأن أنا صغيرة أوى ومعرفش اى حاجة تخلينى أقدر بيها أنى أساعد فى حل المشاكل دى .. بعرضه علشان أفهم أسراء أننا لازم نستوعب الصدمة , صدمة التصديق , تصديق أن ده بجد .. أيون فيه مخدرات وفى كل الحاجات المنيلة بستين نيلة الى ممكن تيجى أو متجيش على بالنا اصلا .. فى كمية فساد فى البلد أنا أكتشفته مؤخرا .. فى كل النواحى وكل المجالات .. كل الى بيلاقى فرصة قدامه بيستغلها , أسوء استغلال .. بيفكر فى مصلحته هو وبس مش مهم يضر مين تانى .. وكل ده بسبب نتانة اتزرعت من سنين كتير .. نتانة وراها مخطط مش سهل زى ما أحنا فاكرين .. مخطط اترتبله صح جدا ولاقه الى ينفذوا صح جدا جدا .. اراء كتير أتغيرت عندى بعد الى شوفته الفترة الى فاتت .. أعتقد أن يمكن يكون ماتت جوايا شوية من البراءة والنظرة البينكى .. كل ده لأنى شوفت حاجات على حقيقتها .. شوفت حاجات صح .. شوفت البُعبُع الى ماما وبابا كانوا بيخوفونى منه .. شوفت الدنيا , بس شوفتها صح !!

21 comments:

  1. انا عن نفسى اتصدمت فى ناس كتيييييييييييييييييييير جدا وشوفت حاجات على حقيقتها كتيييييير اوووى لدرجة انى بقيت متوقعة اى حاجه فى اى وقت ومن اى حد مبقاش فى حاجه بتفاجانى ..

    ReplyDelete
  2. هي دي الدنيا بكل تفاصيلها
    الدنيا مش بريئه ابدا
    فيها الابيض والاسود وبينهم المنطقة الرمادي

    ReplyDelete
    Replies
    1. بالظبط كده

      المشكلة أنى بشوف الأبيض والرمادى بس

      الأسود ده مش بعرف أشوفه

      ولما بشوفه مش بستوعبه

      ولما بستوعبه مش بصدقه

      ولما بصدقه .. بتصدم

      !

      Delete
  3. الدنيا من وقت ماتخلقت فيها الخير والشر..لأن في شيطان وفي نفس أمارة بسوء مينفعش نلغي كل ده ونقول أن الدنيا خير علي طول..
    بس في نفس الوقت مش لازم الحاجات الغلط تأثر عليه بالسلب بل تأثر عليه بالأيجاب في أني أحاول أكون إنسانة كويسه اتقي ربنا وأرضي ربنا
    وفي النهاية مش هيجصلنا أكثر من اللي ربنا كتبه وفي النهاية ده وجودنا لازم نبني ونخد بالنا أنني في عالم بينتهي لأن الدنيا شابت والناس فكره إنها لسه في ريعانه شبابها

    وربنا يحفظك ويحفظ كل المسلمين

    ReplyDelete
  4. دي حقيقه للاسف
    ربنا يعف عنا
    اكتشفت ده يمكن متاخر
    بس لما تهت اوي
    افتكرت اننا فدنيا
    مش فجنه
    فالحمدلله

    ReplyDelete
    Replies
    1. فى الدنيا

      مش فى الجنة

      وده الى لازم نفهمه !

      Delete
  5. الدنيا ياعم دنيا لا حزن دايم فيها ولافرح دايم فيها
    يعنى لا تزعل عليها ولا تزعل منها

    كلامك في الجون ياميهو
    يمكن القلوب الطيبه اللي زيك بتفضل دايما تعافر في الدنيا لاثبات ان الحياه الحلوة
    بس زى مافي كدة في كده وفي كده وفي كل حاجه
    بس انتى اهم تعرفي الخطوه الى هتخطيها فين وازاى
    واحنا كبشر محتاجين نؤمن بوجود المدينه الفاضله يوما ما :)

    ReplyDelete
    Replies
    1. :)

      مين دى الى من القلوب الطيبة !

      أنا !!

      لا اصلا انت فاهمانى غلط خالص اصلا

      ده شوريرة جدا اصلا :$

      وده المعتقد الغلط الى انا عايشة به

      مفروض أحنا فى الدنيا مش فى الدينة الفاضلة زى ما أنا بتعامل

      :)

      Delete
  6. ولسه دي مش النهاية ولسه هنشوف تاني حاجات اسوأ
    اهم حاجة بس ان ده ميأثرش على الحلو اللي جوانا واللي اتربينا عليه وكمان ميخليناش شايفين الحاجة سودا كده على طول علشان زي ما في الوحش فيه برضه الكويس وان شاء الله نبقى احسن في يوم من الايام

    بس لحد ما نتعلم الدين صح -مش دين المصالح بتاع اليومين دول- ما تطلبيش انك تمشي تخبطي في الاخلاق في الشارع كده

    ReplyDelete
    Replies
    1. أكيد طبعا

      أنا واثقة من موضوع أنى هشوف تانى ده :D

      لا بيأثر بصراحة مش هكدب عليك !

      الفكرة أننا بنشوف الحاجة سودا وبرضه تلاقى حاجة جواكى بتقنعك أنها ممكن تتحول لبيضا !

      يا رب نبقى أحسن يا رب

      صعبة الأخلاق دى

      بفكر جديا أتخلى عنها

      :D

      Delete
  7. كلام سليم جداً ,,, أحب أرحب بيكي في عالمنا الواقعي للأسف ...

    مش مهم نكتشف عالمنا ده إمتى ,,, الأهم إننا نفهم معلومة جديدة كل يوم بنعيشه و نستوعب فكرة وجود نماذج البشر المختلفة حوالينا ... و ده اللي بيسموه الخبرة .. و ده اللي بيفرق بين واحد كبير مجرد كبير و واحد ناضج ... فالخبرة هي اللي بتحدد سننا مش عدد السنين اللي عشناها في الدنيا ...

    ReplyDelete
    Replies
    1. الخبرة دى مش بتيجى بالساهل ابدا تصدقى يا أنجى !

      كل حاجة تتعلميها لازم تسيب حاجة جواكى

      معظم الوقت بتبقى حاجات وحشة مع الأسف !

      نورتينى اصلا :)

      Delete
  8. مش شفتيها

    اديها بالجزمه بقى عشان لسه هتشوفى اكتر من كده بكتييييييييييير

    ReplyDelete
  9. مهم نشوف الدنيا طبعـًا بس من غير ما تنسينا مين احنا :)

    ReplyDelete
    Replies
    1. لما تشوفى الدنيا يا سارة

      هتعرفى أنك غلط

      ودى حاجة كويسة

      :D

      Delete
  10. الدنيا طبيعى فيها كل حاجه حلوه مع كل حاجه وحشه
    الكويس واللى مش كويس
    الطيب والخبيث
    وغيره كتير
    الفكره بس
    اننا بنخلى دائما ايه النظره الثابته فى عنينا؟
    وده ياترى بيغير ايه جوانا احنا؟
    وبيغيره للاحسن والا للاسواء؟
    لو قدرنا نجاوب على كل ده صح
    ساعتها بس هنبقى فهمنا لعبه الدنيا دى ماشيه ازاى :))

    ReplyDelete
    Replies
    1. :)

      ياريتها كانت بالسهولة دى يا دينا

      مكنش حد غلب

      كلنا بنبقى متوقعين الوحش وبرضه بنتصدم اصلا

      ساعات فهمنا بيصدمنا اكتر اصلا

      هاه

      ربنا ينجينا

      :)

      Delete
  11. تدوينه كلها صراحه حلوة

    ReplyDelete

عاوزة صراحة فالتعليق
مليش فالمجاملات والكلام ده
يلا سمى الله ودوووس :D