The best things in life are unseen ,, that's why we close our eyes when we kiss, cry, and dream .

3/20/12

عن الأحداث الدقيقة وما ورائها


كتير مننا بيعمل حاجات صغيرة أوى بيبقى هدفه بيها حاجات أكبر
يمكن علشان مش عارف يعبر بالطريقة المناسبة ..يمكن علشان فى وضع ميسمحلوش أنه يعمل أكتر من كده
أو .. أو يمكن علشان مش عايز يبين حقيقة هو مخبيها
بندخل نقرا بوستس عند ناس ونكتفى أننا نعمل أيموشن بيضحك لأن البوست لمسنا بشكل ما
أو مثلا جاتلنا الأفكار دى قبل كده وحسينا بحد بيتكلم عنا,
ساعات نعمل لايك,
كتير نكتفى بالصمت ونفضل نقرا البوست مرة ورا مرة مستنين الى بعده.

بالمناسبة ..

 مرة كان فى ولد بيجيب لبنت معاه فى المدرسة كل يوم بونبوناية
هى مش بتحب البونبونى ومش بترضى تحرجه وبتاخده
فمرة قالته أنت كل شوية تجيبلى بونبونى ليه أنا اصلا مش بحبه
أتكسف الولد وبعد عنها .. وبقه لما يشوفها يبتسم فى أسى وبس
مع الأيام عرفت البنت ان الولد ده بيحبها
وعرفت معنى البونبونانية الى هى كسفته بسببها
هو مكنش بيقدملها مجرد بونبوناية عادية
لا, دى كانت بونبونانية جواها حبه ومشاعره تجاها.

الحكمة .. لازم ناخد بالنا من كل الحاجات الصغيرة الى فى حياتنا
لازم نفهم تصرفات الى قدامنا يقصد بيها أيه
لازم نقدر الى حوالينا وبيحبونا ومنبعدهومش عنا لأن ممكن منلاقيش زيهم
نتمسك بيهم ومنسبهومش يضيعوا منا .. علشان هنرجع نندم بعد كده
لازم نحط كل حد فالمكانة الى يستحقها .. لو حد بنحبه نقوله فى وشه أننا بنحبه
لو حد محتاجينه .. نقوله على طول اننا محتاجينه
لو حد واحشنا .. نجرى نقوله أنه واحشنا
يمكن هو محتاج ده .. محتاج يحس كده فعلا
 هى دى الحاجات الصغيرة الى بتعملنا .. الحاجات الى مفروض نهتم بيها.
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ


25 comments:

  1. تحففففففففه يا جميله انتي
    كلام رائع بس يارب الناس تفهم وتحس
    بالحجات الحلوه الصغيره واللي هي اصلا اهم من حجات كتير كبيره اوووي
    تحياتي ليكي

    ReplyDelete
    Replies
    1. يا ريت يا أنغام والله
      كانت حاجات كتير أوى هتتغير اصلا

      نورتى البلوج كلها اصلا :)

      Delete
  2. اولا حاسة بقالي كتييييييييير معملتش اي كومنت على بوست عند حد وده دليل على الندالة اللي انا فيها :$
    ثانيا بقى بالنسبة للبوست نفسه فانا واحدة من الناس اللي فعلا عانت كتير من الموضوع ده والاكتر بقى هو عدم فهم اللي قدامنا او تقديره لتصرفاتنا البسيطة والصغيرة دي واللي هي بتبقى دليل على حاجات تانية كتير اكبر :)

    ReplyDelete
    Replies
    1. لالالالالالالالالالا
      خالص والله مش ندلة .. لأنى فنفس موقفك يا نور اصلا :$
      بصى موضوع عدم فهم الى قدامنا لينا ده أنا رأيى أننا لازم نفهمهم الأول علشان هما يفهمونا .. ولا أيه ؟؟ :)
      بس ده ميمنعش أن فى ناس مش بتقدر حتى لو أنتى قدرتى كمان

      مبسوطة أنك "هنا" :)

      Delete
  3. مجتش هنا بقالي كتير مش عارفة ليه
    وحشتيني

    ...
    معاكي في الجزء الاول
    لكن مش معاكي اوي في جزء اننا نعبر للي بنحبه اننا بنحبه اوي يمكن عشان ساعات بنحس بعدين انه مكانش يستاهل او اننا كنا غلطانين

    لازم نعرف الاول مين يستاهل ومين لا

    الجزءبتاع اننا نفسر كل الحركات والافعال برضه مش عارفة اصلنا ممكن نقعد نفسر حاجات ونطلع في الاخ بيتهيألنا ونعيش نفسنا في حالة ملهاش وجود

    لازم يبقي فيه دلايل واثباتات لكل حاجة
    :))

    ReplyDelete
    Replies
    1. وأنا برضه مجيتش هنا بقالى كتير .. بس أنا عارفة ليه :)
      وحشتينى :$

      مهو أنتى قبل ما تعبرى .. أختارى الى يستاهل تعبيرك ده .. علشان هترجعى تندمى لو مكانش يستاهل اصلا

      أنا رديت عليكى قبل ما اشوف باقى الكومنت اصلا هههههههههههههههههههه

      مهو مش لازم نصدق فالحاجات لدرجة اللزوقة يعنى
      هههههههههههههههههههه
      ناخد بالنا من الدلايل والاثباتات علشان يبقى تصديقنا فالحاجات مبرر :)

      <3

      Delete
  4. البوست حلو اوي يا لوزه وفعلا عندك حق
    المفروض ناخد بالنا من تصرفتنا مع اللي بنحبهم
    تسلمي على البوست

    ReplyDelete
    Replies
    1. البوست حلو أوى بجد ؟؟
      طويب بالهنا والشفا
      هههههههههههههههههه

      ربونا يخليكى يا ريرى .. كلامك صح :)

      Delete
  5. نورتي مدونتك يا مها..يارب تكوني كويسه وبخير...وتحاولي تخرجي من ايلي انتي فيه...حسه ان البوست بتاعك وانا بقراه بيعبر عن كل ايلي عايزه اقوله..عندك حق في كل ايلي قولتيه عشان الدنيا اصغر من ده كله ومتستاهلش ايلي احنا بنعمله..تسلمي يا قمر

    ReplyDelete
    Replies
    1. البلوج منورة بيكم والله العظيم يا أميرة اصلا مش بيا .. لأنى بسيبها كتير أوى وأنتم الى بتفضلوا واخدين بالكم منها :)

      أنا كويسة الحمد لله .. كويسة طول ما فى ناس زيك وزى كتير أوى بيسألوا عنى ودايما بكون على بالهم :)

      علشان البوست أنا كاتباه يعبر عن حاجات موجودة فيا وفيكى وفى كل الناس .. بالظبط كده الدنيا متستهلش اصلا .. كله بيعدى

      نورتى :)

      Delete
  6. حمدالله على السلامة

    ReplyDelete
    Replies
    1. :)

      حمد لله على سلامتك أنت كمان

      :)

      Delete
  7. حساه البوست ده اوووى
    عشان اوقات الحاجات الصغيره بتبقى احلى بكتير من حاجات تانيه اكبر
    انا بحب الحاجات الصغيره دى اللى مش باينه للنظر بس باينه للقلب :)

    ReplyDelete
    Replies
    1. أنتى ؟؟ ده أنتى هتتعلقى اصلا
      أصبرى عليا بس لما أفوقلك
      مش هخرجك معانا المرة الى جاية على فكرة :P :P

      مش أوقات .. دايما الحاجات الصغيرة بتبقى أحلى اصلا

      نورتى يا هانم :P

      <3

      Delete
  8. روووووووووووووووعة

    ReplyDelete
    Replies
    1. كومنتاتك صغيرة .. بس أنا بحبها :)

      Delete
  9. كل سنة وانتي طيبة ياغالية
    ربنا يكرمك

    ReplyDelete
    Replies
    1. وحضرتك طيبة
      ربنا يخليكى يا رب اصلا :)

      Delete
  10. عجبتنى جدا قصة الولد والبنوته
    تصدقى فى فعلا حاجات ممكن تبقى صغيرة جدا بس شايله مشاعر تجنن

    ReplyDelete
    Replies
    1. ريمااااااااااااااااااس

      لسه شايفة الكومنت بتاعك عنى عند رنا
      بقه مستنية فضحتى يا ريم ؟؟ :$

      أتفضلى الحدوتة بالبونبوناية :)

      وحشتينى !

      Delete
  11. انا اول مرة ادخل هنا بس البوست بنتاعك جميل ،صحيح في حاجات بنفضل نخبيها في قلوبنا لحد متضيع مننا الفرصة علشان نقولها ،والحاجة البسيطة ساعات معناها بيبقي كبيييير
    ارجو اني اكون ضيفة خفيفة علي قلبك

    ReplyDelete
    Replies
    1. :)

      كلامك عجبنى أوى اصلا مش عارفة أقول غير كده

      أتمنى متكونش أخر مرة علشان أنتى حقيقى نورتى :)

      Delete
  12. ههههههههههههههههههه
    انتي عسل اوي
    ...
    انا كمان قريت جزء الكومنت لما شوفت تعليقك وبعيدن كملت
    هههههههههه

    الجملتين دول منفصلين
    مجتش هنا بقالي كتير مش عارفة ليه
    ...........
    ,,,
    وحشتيني
    :DDDD

    ReplyDelete
    Replies
    1. ربنا يخليكى يا سوو :$

      أنا اصلا برد على جزء جزء اصلا مش بقرأ كله وبعدين أرد :D
      علشان كده بعد ما رديت عليكى لقيتك كاتبة نفس الى انا كاتباه اصلا هههههههههههههههههههه

      أيون مانا عارفة

      والجملتين بتوعى برضه منفصلتين .. مش بقول أنا عارفة ليه وحشتينى .. بقول أنا عارفة ليه بقالى كتير مجتش هنا عندى

      سوء تفاهم :D

      Delete
  13. كم هى جميلة وصغيرة الاشياء التى احبها

    كم تعنى لى الحياه
    ربما تكون مجرد كلمة او بسمه


    نحتاج لوضوح منا ومن الخرين كى تكون الحياه افضل

    ولكن هى نفسها الحياه التى جعلتنا اقرب للغموض ان لم يكن طبعا فهو امر مكتسب

    تسلم ايدك
    سعيدة بدخولى هنا وشكرا لرونى انها عرفتنى على مدونتك

    دمت بخير صديقتى الجديدة :)

    ReplyDelete

عاوزة صراحة فالتعليق
مليش فالمجاملات والكلام ده
يلا سمى الله ودوووس :D