عن الأحداث الدقيقة وما ورائها

كتير مننا بيعمل حاجات صغيرة أوى بيبقى هدفه بيها حاجات أكبر

يمكن علشان مش عارف يعبر بالطريقة المناسبة ..يمكن علشان فى وضع ميسمحلوش أنه يعمل أكتر من كده

أو .. أو يمكن علشان مش عايز يبين حقيقة هو مخبيها

بندخل نقرا بوستس عند ناس ونكتفى أننا نعمل أيموشن بيضحك لأن البوست لمسنا بشكل ما

أو مثلا جاتلنا الأفكار دى قبل كده وحسينا بحد بيتكلم عنا,

ساعات نعمل لايك,

كتير نكتفى بالصمت ونفضل نقرا البوست مرة ورا مرة مستنين الى بعده.

بالمناسبة ..

 مرة كان فى ولد بيجيب لبنت معاه فى المدرسة كل يوم بونبوناية

هى مش بتحب البونبونى ومش بترضى تحرجه وبتاخده

فمرة قالته أنت كل شوية تجيبلى بونبونى ليه أنا اصلا مش بحبه

أتكسف الولد وبعد عنها .. وبقه لما يشوفها يبتسم فى أسى وبس

مع الأيام عرفت البنت ان الولد ده بيحبها

وعرفت معنى البونبونانية الى هى كسفته بسببها

هو مكنش بيقدملها مجرد بونبوناية عادية

لا, دى كانت بونبونانية جواها حبه ومشاعره تجاها.

الحكمة .. لازم ناخد بالنا من كل الحاجات الصغيرة الى فى حياتنا

لازم نفهم تصرفات الى قدامنا يقصد بيها أيه

لازم نقدر الى حوالينا وبيحبونا ومنبعدهومش عنا لأن ممكن منلاقيش زيهم

نتمسك بيهم ومنسبهومش يضيعوا منا .. علشان هنرجع نندم بعد كده

لازم نحط كل حد فالمكانة الى يستحقها .. لو حد بنحبه نقوله فى وشه أننا بنحبه

لو حد محتاجينه .. نقوله على طول اننا محتاجينه

لو حد واحشنا .. نجرى نقوله أنه واحشنا

يمكن هو محتاج ده .. محتاج يحس كده فعلا

 هى دى الحاجات الصغيرة الى بتعملنا .. الحاجات الى مفروض نهتم بيها.

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

مُنى وفقط :)

الصورة عاجبانى جدا اصلا .. أنا وأنت أهو يا منمونى :)

الموضوع مكنش مترتبله بقبلها بكتير .. متوقعتش أنه هيحصل بين يوم وليلة كده

مش هتتخيلى أنا كنت مبسوطة أزاى أنى هقابلك اصلا

وزى ما قولتلك أنى ضحيت بالتورتة ومأكلتش علشان أجى ألحقك 

هههههههههههههههه

موضوع البالونات ده بقه يااااااااااااااااه يا منى .. بجد أنت مش عارفة أنا قد أيه أتبسطت اصلا

كنت مكسوفة جدا لأن مواقف الهدايا دى بأُحرج منها اصلا 

مش حكاية أنك جبتيلى 2 أو 10 لا .. بس أنا حسيت منك باهتمام كده 

بجد والله اصلا كنت طايرة من الفرحة .. ده غير الأهم طبعا الجالكسى ;)

دى كانت تانى جالكسيايه تجيلى فنفس اليوم بعد الى ادوهالى فالكورس اصلا 

أتشهرت بالجالكسى أنا خلاص :$

أنت جميلة بجد بجد يعنى :)

موضوع هايبر وأكتف ده عادى  جدا لأنك شوفتينى بعد كورس الأتش آآر .. فكان كلى طاقة اصلا

ههههههههههههههههههه .. عادى مش متفجأة خالص علشان كله بيقولى كده .. أنا طقّة ولاسعة :$

أنت كنت مكسوفة وكان باين عليك جدا أنت وأميرة اصلا

وعلشان كده أنا مبطلتش رغى علشان أكسر الكسوف ده 

مش كنت مبهدلة ولا عبيطة اصلا 

كنت عسولة جدا جدا وصوتك زى التليفون :)

أوعدك ببرفيوم أكبر المرة الجاية .. وأحلى كمان 

أنا الى مش عارفة أحكى والله :$

منى .. أنا بجد متشكرة جدا جدا ومش هقولك على أيه

علشان فى حاجات لما بتتقال مش بتوصّل المعنى الحقيقى بتاعها 

أنا بحبك قوى <3

دموع الكلمات

قلت: لن تصدقيني،ولن يصدقني أحد إذا قلت لك أنني كنت أفكر فيك في نفس اللحظة التي وجدتك فيها أمامي..

قالت: الحب الحقيقي لا يموت..يتوارى في داخلنا،يشعر بتجاهلنا له..ولكنه فجأة يصيح في داخلنا.
قلت: نسيت أن أطلب لك فنجانا من القهوة..
قالت: ربما نشربه معا بعد أعوام.
قلت: مازال فيك تفاؤلك القديم.
قالت: مازلت تقول أنك لن تعيش طويلا.
قلت: لم يعد يعنيني العمر..العمر ليس سنوات نعيشها،العمر أشياء تعيش في داخلنا لأن هناك أشياء لا نذكر منها شيئا..وأنا أعيش معك دائما..
ألم أقل لك يوما:
سوف ألقاك حياة..
في زمان ميت الأنفاس..ممسوخ الرفات..
سوف ألقاك عبيرا..
بين يأس الناس عذب الأمنيات.. 
دائما أنت بقلبي..
رغم أن الأرض ماتت..
رغم أن الحلم مات..
ربما ألقاك يوما ..في دموع الكلمات....

فاروق جويدة

Note to self !

الأماكن بتتغير .. الناس بتتغير .. الأيام بتتغير .. الثوانى والدقايق والساعات بتتغير .. فصول السنة والسنين بتتغير

بس أنا زى مانا !

بتتغير فيا الحاجات الى عايزاها تفضل معايا .. وتفضل فيا الحاجات الى بتعذبنى

مبحبش أواجه مشكلة لوحدى .. مع أنى معظم الأحيان بيبقى لازم أكون لوحدى. الصدمات كترت قوى .. بجد يعنى  .. قوى.. صدمات حتى فيا !

هتحملى لحد أمتى ؟؟ مش عارفة .. طيب هتواجيها لوحدك ؟؟  أعتقد .. وأخرتها ؟؟ السؤال ده مش مفروض يتسألى أنا لأنى أكيد مش أنا الى بصدم نفسى يعنى

محدش يقولى العبارات الى بقيت بكرهها دى بتاعة أنتى عارفة أنى مش عارفة أيه .. أنتى فاهمة أنى كذا .. أحنا طول عمرنا بتاع .. أكيد أنتى كذا .. من الأخر بقه .. أنا لا بقيت فاهمة ولا عارفة ولا متأكدة من حاجة ولا من حد اصلا .. حتى نفسى

أتحبيتى؟؟ أه .. كام مرة ؟؟ يمكن مرة 2 3 10 , الله أعلم .. أتحبيتى ؟؟ أعتقد ! كام مرة ؟؟ مرتين .. أتحبيتى ؟؟ بيقولوا .. كام مرة?? مش عارفة .. أتحبيتى ؟؟ لا !

أكتشفت أنى معقدة قوى اتقالى أنى فلسفية منطقية عقلانية وأن الحياة متنفعش كده لازم شوية بساطة

أتقالى انى قافلة على نفسى وبوقف حالى ومش هتجوز :D

كمان مش بعرف استغل الفرص وبضيعها وبرجع اندم .. لما بترجع مش بعرف أستغلها تانى برضه

مها, هو أنت ايه ؟؟ مفروض تعملى كل حاجة, صح؟؟ أه .. ومن غير ما تشتكى, صح ؟؟ أه .. أنت بس الى تاخدى بالك, صح ؟؟ اه .. مش هرد عليكى اصلا

ثم أنا كبيرة وعاقلة .. ثم بتحمل كتير ..

الحل أيه دلوقتى ؟؟ بقيت بتنرفزنى قوى على فكرة يا سؤال  أنت .. أقولك الحقيقة .. علشان كل مرة مش بعرف اجاوب عليك

تماسكى .. مش هتضعفى .. عديتى كتير .. تعبتى ده اكيد .. هجيبلك جالاكسى وفلوتس وأم آند أمز وكل الحاجات الحلوة

مها أنت بقيتى بتخافى تسكتى .. علشان لا تفكرى ولا تفتكرى .. كده غلط .. لو سمحتى بلاش ضغط

الجامعة+الكورس ال إي دى يو +كورس ال آى أس تى+المشاكل الى أنت قاصدة تندمجى فيها .. كده مرتاحة أنت ؟؟

"يا قلبى يا موجوع اياك تكون قلقان"

مها .. أحمدى ربنا عليك. مرة هتصحى تلاقى نفسك فالدنيا الى أنت عايزاها .. بس اصبرى

مها .. خلى بالك من مها

(غموض .. حيرة .. عتاب .. لوم .. ندم .. تحدى .. صدّْ)

أزاى ممكن تشوف كل ده بمجرد نظرة فعين حد ؟؟

Short pictured story

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ