The best things in life are unseen ,, that's why we close our eyes when we kiss, cry, and dream .

4/29/12

أنين فى القلب

أنين فى القلب يوقف دقاته,, يألمنى
 أنين فى القلب ينادى مذبوح الصوت ,, يستبقيك
أنين فى القلب يشعل نارا لن تطفئ ,, يقسم لن يستكين
أنين فى القلب يلعنك ,, يتمنى عودتك .. ينساك  ,, يتذكرك
أنين فى القلب يجعل أطياف الذكرى حاضر لا يقبل الا أن يبقى كذلك
أنين فى القلب ينتظرك .. يحبك .. يذوب شوقا لك
أنين فى القلب خلق منـــــك .. ولــــــك
 ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

4/27/12

حدوتة .. بجد

الدنيا مش حلوة أوى ولا هادية وبريئة أوى زى ما أحنا متخيلين .. الدنيا مش جامعة وصحاب وحب ومشاكل بس .. مش حب وغرام وهيام وقلوب حمرا .. فى حاجات كتير جدا أحنا لسه مش عارفين عنها حاجة .. زينا زى ابن الاغنيا لما يشوف الناس طوابير على الفرن بتاع العيش ويستغرب أوى ويقول "طيب ليه مش بيجيبوا فينو !" .. الدنيا فيها جانب شر أحنا من هبلنا مش متخيلين أنه موجود .. فيها الأبن الى بيقتل أبوه فى خناقة .. فيها الأب الى بيغتصب بنته .. فيها الأب الى بيبهدل عيلته علشان الشرب والخمرة .. فيها حاجات لا حصر لها .. حاجات من الى أحنا بنسمعها كأنها حدوتة .. كأنها حكاية سندريلا أو سنووايت .. كأنها حاجات أتعملت علشان تتسمع بس ومنعيشهاش .. أحنا بنفكر فى الخمرة والمخدرات والدعارة أنها حاجة بعيد عننا .. لأن أهلنا ربّونا وحطوا جوانا قيم وأخلاق تخلى مخّنا يتبرمج أن من كتر ما الحاجات دى وحشة , مينفعش تتعمل اصلا ولا ينفع تبقى موجودة بجد .. القيم والأخلاق الى بتخلينى أنا شخصيا اتنرفز لما حد يتكلم مجرد كلام عن الحاجات دى .. القيم والأخلاق الى بتخلينى أتصدم لو شوفت حاجة من الحاجات دى بجد أو سمعت من حد عنها .. القيم والأخلاق الى بتولّد جوانا القلق والخوف على الى بنحبهم من أنهم يتعرضوا لأى حاجات من دول .. مش بعرض الموضوع علشان نحله .. لأن أنا صغيرة أوى ومعرفش اى حاجة تخلينى أقدر بيها أنى أساعد فى حل المشاكل دى .. بعرضه علشان أفهم أسراء أننا لازم نستوعب الصدمة , صدمة التصديق , تصديق أن ده بجد .. أيون فيه مخدرات وفى كل الحاجات المنيلة بستين نيلة الى ممكن تيجى أو متجيش على بالنا اصلا .. فى كمية فساد فى البلد أنا أكتشفته مؤخرا .. فى كل النواحى وكل المجالات .. كل الى بيلاقى فرصة قدامه بيستغلها , أسوء استغلال .. بيفكر فى مصلحته هو وبس مش مهم يضر مين تانى .. وكل ده بسبب نتانة اتزرعت من سنين كتير .. نتانة وراها مخطط مش سهل زى ما أحنا فاكرين .. مخطط اترتبله صح جدا ولاقه الى ينفذوا صح جدا جدا .. اراء كتير أتغيرت عندى بعد الى شوفته الفترة الى فاتت .. أعتقد أن يمكن يكون ماتت جوايا شوية من البراءة والنظرة البينكى .. كل ده لأنى شوفت حاجات على حقيقتها .. شوفت حاجات صح .. شوفت البُعبُع الى ماما وبابا كانوا بيخوفونى منه .. شوفت الدنيا , بس شوفتها صح !!

4/26/12

كلام سيبقى الى الأبد 2

نفسى أبقى باردة ومعنديش دم -
مفيش حد كده على فكرة -
لا والله فيه -
 بيبقى شايل جواه كتير ولما بيكتم فى نفسه بيتعب أكتر بكتير -
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

كلماتكَ ترسلني إلى هُناك .. حيثُ لا هناك إلا أنــا وكلماتكَ وعَــيناك ..!

محمود درويش



4/24/12

لساك دفا

لسّاك دفا .. لسّاك برغم البرد ساكن فى الضلوع
ازاى بتعرف تبقى بلسم للجروح
مع ان جرحك لسة حىّ
مع ان عتمة دنيتك..
! علقم ..
بتعرف تبقى ضىّ


Thanks to Rara :)
 ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

4/20/12

وردة

 (: عمركم شوفتوا وردة لما بنقطع عنها المية .. بتكبر أكتر ما بنسقيها ؟؟

على الهامش : فى مفاجأة قريب بجهزلها بأذن الله .. أدعولى تبقى حلوة :)

4/19/12

كلام سيبقى الى الأبد

دقيقة ضغط وجاى -
مااشى -
أنا جيت .. أه تعبت -
ألف مليون سلامة -
أنت هتعيش الدور .. هو أنا بقولك أنا أتعورت .. دول حبة ضغط -
أنا أستاهل .. أحسن يا رب تتعب -
يا رب -
لا بعد الشر مش من قلبى -
يا واد يا حنين -
____________________________________

على الهامش .. ده نوع بوستات جديد هيضم حوارات خيالية .. وهذا ما يجعلها أبدية

4/18/12

عن الافتقاد

يعنى أيه افتقاد ؟؟ يعنى أيه كلمة "أنا مفتقدك"؟؟
افتقاد يعنى نقص .. نقص يعنى خلل .. خلل يعنى اضطراب .. اضطراب يعنى عدم توازن
لما حد بنحبه أوى يبعد عنا .. بنقول ياااه ده أنا مفتقده ..
وقتها أنت بتبقى حاسس أن جواك جزء فاضى .. المكان الى يخصه عندك بيسألك هو فين
لما حد بيجيب لحد هدية .. ولما الحد التانى يحس ان الحد الأول واحشه.. فيطلع الهدية يحطها قدامه يتلمسها ويبتسم
هو فى الحقيقة مش بيتفرج على الهدية لأنها عاجباه .. لا .. ده بيتفرج لأنها منه ..
بتحسسه أنه موجود معاه .. بتشبع جواه جزء من افتقاده ليه
بتحسسه أن هو جنبه وأنه مبعدش ولا حاجة
لما بتفتقد حد بتعمل أيه ؟؟
بتتفرج على صوره .. بتقرا كلامه .. بتفتكر مواقفكم سوا .. ضحك ولعب ومناقشة
بمناسبة الصور بقه .. أنا بقى عندى ولع غريب أنى أفتح الصور وأفضل باصه كده
بدقق فى كل تنتوفة فى ملامح الشخص الى فى الصورة .. ده أنا كمان بقيت بحلل شخصيته من خلال صورته
الأفتقاد بيعمل أكتر من كده والنبى ههههههههههههههههههههههه
  بس لو أنت مفتقد نفسك بقه ؟؟ أيه الحل ساعتها ؟؟ هتجيب صورة ليك برضه وتفضل
باصصلها ؟؟
أنا عايزة كل حد هيقرا البوست ده يوصفلى احساس الافتقاد فى جملة :)

“ الليلُ تاريخ الحنين، وأنت ليلي ”
 محمود درويش



4/16/12

لخبطة

بسم الله الرحمن الرحيم
أول بوست من اللاب توب الجوديد الأحمر .. هو نبيتى شوية يعنى ..
 بما أنى لبست نبيتى وكوووول الناس قالولى أن شكلى حلو أوى فيه .. قررت مالبسهوش تانى بعد ما واحد دمه خفيييييييييف :@ وقفنى يسألنى على مكان أكتشفت أنه عارفه علشان يعاكسنى الساعة 8 الصبح ويقولى أنت عسولة أوى لا وكمان يسبّلّى عينيه :@
هاه .. المهم .. أنا جيييييت أهووووووو .. وحشتوكم أيون عارفة اصلا :$
طويب نبدأ منين ؟؟ مممم .. ممكن نقول شوية لخبطة كده مش هتضر يعنى
نقول لأيناس الحمد لله على سلامتك 
نقول لمنمونى كل سنة وأنت طيبة
نقول لكورونتى أنى عايزة الصور الى صورتهالى يا بنت الأيه يا لذينا
ولسهاد أنا جيت أهو زى ما وعدتك ;)
ولرحمة يلا بقه أتجوزى بسرعة عايزين نخلص منك يا ساتر :P
 ولسارة أنتى وحشتينى جدا اصلا
نقول للروقان حمد لله على السلامة
نقول لدينا أنى زعلانة منها على فكرة
نقول لنيللى على أنها وحشتنى
ولنيللى عادل أنى هخرجك لا تقلقى
 ولعمو فاروق أنى هخرج معاك شم النسيم الجاى بأذن الله .. ظبطلى رحلة حلوة من دلوقتى :$
ولرضوى حاولى تفضى الأسبوع الجاى
ولرنيا مبروك يا عروسة .. عايزة أعرف الجواز حلو ولا لا علشان يمكن أغير رأيى أخليه بدل 8 سنين .. يبقى بعد 7 ونص بس :$
بسكوتى ومنى درويش وسارة جبالى وحشتونى جدا برضه

  يعنى أيه شم النسيم ؟؟ يعنى سعاد حسنى والدنيا ربيع
 يعنى ألوان على البيض وألوان فى الجو وألوان فى القلب
يعنى يتبعتلك مسدج كل سنة وأنت طيب وطبعا وكالعادة متعرفش ترد عليها علشان  أنت  مفلس ومش بتشحن اصلا فتضطر تبعت من موبايل أختك الصغيرة :$
 كل سنة وكلكم طيبين .. يا رب تكونوا قضيتوا شم نسيم عسول أمور سكور كده .. فيه رنجة وفسيح وكله ألوان
مينفعش أنهى من غير ما اللاب يقولوكم كل سنة وأنت طيبين بنفسه ;)
قولولى مبروك بقه :$

4/3/12

الأسود احيانا .. يكون الأفضل


أرتبط مفهومها بالأبتسامة .. بالصوت الذى يرسم حولهم قوس قزح
بالحركة الدائبة التى تنشر حولهم فراشات ملونة
فكان كل من يتحدث إليها يخر معترفا أن لديها القدرة على نشر ورود التفاؤل البينكى
وما تلبث أن تتحول هذه الورود لورود حب حمراء مصاحبة لتلك الياسمينات البيضاء .المخلوطة بلون قلبها
بعض خيوط النور ستكون لا بأس بها فى تغليف هذه التوليفة
هل أسلبها هذا حقها فى البقاء -ولو قليلا- فى اللون الاسود ؟؟
هم .. يكرهون الأسود .. لا يريدون حُبُه عند تلوُنها به
يصرون كل الأصرار أن الأسود لم يخلق لها
هى .. حاولت أدخال الأبيض .. فتحول لونها لرمادى 
فأصبحت مائعة .. لا طعم لها
حينها تمنّوا لو تركوا الأسود يحظى بنصيب منها 
فَتُنير.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

نسيت يـا مجهولـةَ الـصـوت : رحيلك أصـدأ الجيتار .. أم صمتي ؟...محمود درويش